საზოგადოება

უმკაცრესად დაისჯება ყველა დამნაშავე და ამ ფაქტს მოყვება მკაცრი რეაგირება - კახა კალაძემ

თბილისის მერმა კახა კალაძემ მეტროსადგურ „ვარკეთილში“ ჭერის ჩამონგრევის ფაქტთან დაკავშირებით განაცხადა, რომ ამას მოჰყვება მკაცრი რეაგირება. მერის ინფორმაციით, კომპანია „ყვარელრემმშენმა“, რომელმაც მეტროსადგურის სარეაბილიტაციო სამუშაოები განახორციელა, მან ასევე შეარემონტა „ახმეტელის“ მეტრო. კალაძემ აღნიშნა, რომ ამის გათვალისწინებით „ახმეტელის“ მეტროს შემოწმება დღესვე დაიწყება.

„სამწუხაროა ეს ფაქტი. განსაკუთრებული ყურადღება დაეთმობა მშენებლობებს, მის ხარისხს. უმკაცრესად დაისჯება ყველა დამნაშავე და ამ ფაქტს მოყვება მკაცრი რეაგირება. სამუშაოები ამ ობიექტზე აგვისტოში დასრულდა და სექტემბერში იყო ექსპულატაციაში მიღებული. ამ კომპანიას სამუშაოები აქვს ჩატარებული მეტრო „ახმეტელზე“ და დღესვე დაიწყება გადამოწმება, თუ როგორ არის იქ ჩატარებული სამუშაოები. ამ კონკრეტულ ფაქტს მკაცრი რეაგირება მოჰყვება“, -უთხრა კალაძემ ჟურნალისტებს.

მეტროსადგურ „ვარკეთილში“ ჭერის ნაწილის ჩამოშლის შედეგად დაშავებულთა რიცხვი 11-მდე გაიზარდა, მათ შორისაა საპატრულო პოლიციის ერთ-ერთი თანამშრომელი.

დაშავებულები სამედიცინო დაწესებულებებში გადაიყვანეს.

არსებული ინფორმაციით, ჩამოიშალა „შეკიდული ჭერი“.

ადგილზე უკვე მოვიდა ქალაქის მერი კახა კალაძე.

შემთხვევის ეპიცენტრში მობილიზებული არიან სამაშველო სამსახურები.