პოლიტიკა

უნდა მივიღოთ კანონი მატყუარა მთავრობის წევრების დასასჯელად - რომან გოცირიძე

უნდა მივიღოთ კანონი „ტყუილის მთქმელთა დასჯის“ შესახებ, - აღნიშნული ინიციატივით პარლამენტის პლენარულ სხდომაზე, ფრაქცია ნაციონალური მოძრაობის თავმჯდომარე, რომან გოცირიძე გამოვიდა.

დეპუტატმა ტყუილი უწოდა ინფორმაციას, რომელიც ფინანსთა მინისტრის მოადგილემ გიორგი კაკაურიძემ 2016 წლის ბიუჯეტის ანგარიშის შესრულებისას წარადგინა.

,,გასული წლის ბიუჯეტის შესრულების ანგარიშს, რომელში როგორც სარკე ისე ჩანს ქვეყანაში შექმნილი მძიმე ეკონომიკური მდგომარეობა, ჩვენ მხარს არ დავუჭერთ’’, - განაცხადა რომან გოცირიძემ.

მისივე თქმით, ტყუილის დადადასტურების შემთხვევაში, ხელისუფლების წარმომადგენლები აუცილებლად უნდა დაისაჯონ.

,,აზერბაიჯანში დეპუტატი გამოვიდა საკანონმდებლო ინიციატივით, რომლის მიხედვით პარლამენტის წევრს უნდა აკრძალვოდა მლიქვნელობა და მაამებლობა.

თუ იმ პარლამენტში ესაა პრობლემა, ჩვენთან სხვა საკითხია აქტუალური: მთავრობა ატყუებს პარლამენტს.
უნდა მივიღოთ კანონი მატყუარა მთავრობის წევრების დასასჯელად’’, - აცხადებს რომან გოცირიძე.

ნინო ექვთიმიშვილი