სამართალი
უნდა შემოვიყვანოთ უცხოელი მოსამართლეების ინსტიტუტი - გიორგი ვაშაძე
სამოქალაქო პლატფორმამ - „ახალი საქართველო“ საკონსტიტუციო ცვლილებების პაკეტის პრეზენტაცია გამარათა.
პრეზენტაციაზე წარმოდგენილი იყო ის რეფორმები, რომელიც „ახალი საქართველოს“ აზრით კონსტიტუციაში უნდა განხორციედეს.
განიხილეს ისეთი საკითხები, როგორიცაა პრეზიდენტისა და მთავრობის კომპეტენციების კონსტიტუციით განსაზღვრა, სასამართლო რეფორმა და უცხოელი მოსამართლეების მოწვევა, პროკურატურის გარდაქმნა დამოუკიდებელ საკონსტიტუციო ორგანოდ, ახალი რეგულაციების შემოღება საქართველოს მოქალაქეობის მინიჭების საკითხში და სხვა.
„ახალი საქართველოს“ ხელმძღვანელის გიორგი ვაშაძის აზრით, კარგი იქნება თუ ქვეყანაში უცხოელი მოსამართლეების ინსტიტუტი იქნება შემოღებული.
ვაშაძის განმარტებით, უცხოელი მოსამართლეები საოლქო დონეზე უნდა დაინიშნონ და მათ უნდა დაევალოთ მნიშვნელოვან საკითხებზე გადაწყვეტილების მიღება, როგორებიც არის ადამიანების უფლებები და თავისუფლებები, პოლიტიკასთან კავშირში მყოფი საქმეები და ბიზნესსა და სახელმწიფოს შორის არსებული დავები.
„იმ რეალობიდან გამომდინარე რაც დღეს ქვეყანაში არის, რა უბედურ დღეშიც არის სასამართლო სისტემა, ჩვენ ვფიქრობთ, რომ ერთადერთი გამოსავალი არის შემოვიყვანოთ უცხოელი მოსამართლეების ინსტიტუტი საოლქო დონეზე და ამ მოსამართლეების მეშვეობით მივიღოთ გადაწყვეტილება ისეთ მნიშვენლოვან საკითხებზე, როგორიც არის პირველი, ადამიანის უფლებები და თავისუფლებები, სიტყვის გამოხატვის უფლება, ადამიანის პიროვნული უფლებები, რომელიც არის კონსტიტუციის მეორე თავით გარანტირებული. მეორე, პოლიტიკური თანამდებობისა და პოლიტიკოსებთან დაკავშირებული საქმეები და მესამე, ძალიან მნიშვნელოვანია დავები ბიზნესსა და სახელმწიფოს შორის“,-აღნიშნა ვაშაძემ.
რაც შეეხება პროკურატურაში განსახორციელებ რეფორმას, ვაშაძის აზრით, საგამოძებო უწყება დამოუკიდებელ საკონსტიტუციო უწყებად უნდა ჩამოყალიბდეს.
„პროკურატურა არ უნდა იყოს არც აღმასრულებელი, არც სასამართლო და არც საკანონმდებლო ხელისუფლების ვერტიკალის ქვეშ. ის უნდა იყოს დამოუკიდებელი საკონსტიტუციო უწყება, რომელსაც გამოძიების უფლება არ ექნება, ანუ მოხდება პროკურატურიდან ძალაუფლების დეკონცენტრაცია. ასე ჩვენ ფუნდამენტურად შევცვლით ყველაზე მნიშვნელოვან საკითხებს და ადამიანი ხვალ არ გვკითხავს, სად არის სამართლიანობა, სად არის კანონის უზენაესობა და დამოუკიდებელი მოსამართლე“,-აღნიშნა ვაშაძემ.
პრეზენტაციაზე აღინიშნა, რომ აღნიშნულ საკითხებზე „ახალი საქართველო“ კონსულტაციებს რამდენიმე თვის განმავლობაში უცხოელ ექსპერტებთან მართავდა.
მონიკა დავლიანიძე