მსოფლიო

უნდა ვიყო იმ ხალხის გვერდით, ვის მიმართ მთავრობა რეპრესიებს ატარებს - იულია ტიმოშენკო მიხეილ სააკაშვილის სასამართლოზე გამოცხადდა

კიევის პეჩერსკის რაიონულ სასამართლოში საქართველოს ყოფილი პრეზიდენტისა და ოდესის ექს-გუბერნატორის, მიხეილ სააკაშვილის მხარდასაჭერად უკრაინული ოპოზიციის ერთ-ერთი ლიდერი, იულია ტიმოშენკო მივიდა.

როგორც ტიმოშენკომ იქ მყოფ ჟურნალსიტებს განუცხადა, ის იმ ხალხის გვერდითაა, ვის მიმართ მთავრობა „რეპრესიებს ატარებს“.

„ მე ვფიქრობ, რომ უნდა ვიყო იმ ხალხთან ახლოს, ვის მიმართ მთავრობა რეპრესიას ატარებს იმისათვის, რომ კიდევ ერთხელ ვთქვა, რომ ეს პოლიტიკური რეპრესიებია, ესაა ოპონენტებზე ანგარიშსწორება, რომ არანაირი სამართალი ამ სასამართლოსა და ძალოვან სტრუქტურებში არ არსებობს. უნდა დავიცვათ თავისუფლება, დემოკრატია და რა თქმა უნდა, მიხეილ სააკაშვილი, რომელსაც დღეს ძალიან უხეშად ექცევიან“, -თქვა ტიმოშენკომ.

ამ წუთებში კიევის პეჩერსკის რაიონულ სასამართლოში მიხეილ სააკაშვილისთვის აღკვეთის ღონისძიების შეფარდების შესახებ მსჯელობენ. „ახალი ძალთა მოძრაობის“ ლიდერს საპატიმრო კაბინიდან გასვლის საშუალება მისცეს. სააკაშვილი თავისი ადვოკატის გვერდით ზის.

ანა მებურიშვილი