საზოგადოება
უნგრეთის მთავრობამ 2015 წლის თბილისის სტიქიით დროს დაზარალებულთა მხარდასაჭერად საქართველოს წითელი ჯვრის საზოგადოებასთან შეთანხმება გააფორმა
უნგრეთის საგარეო საქმეთა და საგარეო ვაჭრობის მინისტრი პიტერ სიიარტომ უნგრეთის მთავრობის სახელით ხელი მოაწერა შეთანხმებას 2015 წლის თბილისის წყალდიდობის დროს დაზარალებულთა ჰუმანიტარული დახმარების შესახებ.
ხელმოწერის ცერემონია თბილისში, სასტუმრო ,,რედისონ ბლუ ივერიაში’’ გაიმართა.
საქართველოს მხრიდან ხელშეკრულებას ხელი მოაწერა საქართველოს წითელი ჯვრის პრეზიდენტმა ნათია ლოლაძემ.
შეთანხმების შედეგად უნგრეთის მთავრობამ 32 000 ევრო გამოყო წითელი ჯვრის საზოგადოების ფსიქოსოციალური ცენტრისთვის, რომლის მიზანიც 2015 წლის 13 ივნისის წყალდიდობით დაზარალებულთა დახმარებაა საკვები თუ არასაკვები ამანათებით და ბავშვებისათვის ფსიქოსოციალური მხარდაჭერის აღმოჩენა.
როგორც უნგრეთის საგარეო საქმეთა და ვაჭრობის მინისტრმა, პიტერ სიიარტომ განაცხადა, უნგრეთი ისევე მდიდარია წყლებით, როგორც საქართველო და უნგრელებმა ისევე კარგად იციან, თუ რას ნიშნავს სტიქიურ უბედურებასთან ბრძოლა.
მისი თქმით, სწორედ ამიტომ, უნგრეთის მთავრობამ გადაწყვიტა მხარდაჭერა აღმოეჩინა საქართველოს წითელი ჯვრის საზოგადოების ფსიქოსოციალური ცენტრისთვის, რომელიც 2015 წლის ივნისის წყალდიდობით დაზარალებულებს უწევს დახმარებას.
თავის მხრივ, როგორც საქართველოს წითელი ჯვრის საზოგადოების პრეზიდენტმა, ნათია ლოლაძემ აღნიშნა, გაფორმებული ხელშეკრულებით გათვალისწინებული ფულადი დახმარება ფსიქოსოციალური ცენტრის ფუნქციონირების გაგრძელების საშუალებას იძლევა.
,,2015 წლის 13 ივნისის წყალდიდობის შემდეგ გაიხსნა ფსიქოსოციალური ცენტრი, სადაც ჩვენ გავუწიეთ დაზარალებულებს დახმარება.
დღეს ახალ ხელშეკრულებას მოეწერა ხელი, რომლის შედეგადაც, უნგრეთის მთავრობის დახმარებით ფსიქოსოციალიური ცენტრი გააგრძელებს ფუნქციონირებას და აღმოუჩენს დაზარალებულ ოჯახებს მხარდაჭერას. აქ საუბარია ძირითადად ფსიქოლოგიური დახმარებაზე ბავშვებისათვის’’, - განაცხადა ნათია ლოლაძემ.