პოლიტიკა

უშიშროების საბჭოს გაუქმებით ვიღებთ შესუსტებულ თავდაცვასა და არაინფორმირებულ, უფუნქციო უმაღლეს მთავარსარდალს - პრეზიდენტი

საქართველოს პრეზიდენტის აზრით, პირველი პირის უფლებების შემცირებით სუსტდება ქვეყნის უსაფრთხოება და თავდაცვისუნარიანობა.

როგორც გიორგი მარგველაშვილის პრესსპიკერმა, ეკა მიშველაძემ განაცხადა, ამას გამოიწვევს უშიშროების საბჭოს გაუქმება.

„გარდა ამისა, წარმოდგენილ პროექტში უგულებელყოფილია ამომრჩევლის უფლება - ხალხისთვის პრეზიდენტის საყოველთაო არჩევის ნების წართმევით. თუმცა კიდევ უფრო საგანგაშოა ის, რაც პრეზიდენტის უფლებების შეკვეცის შედეგად, უარყოფითად აისახება ქვეყნის უსაფრთხოებასა და თავდაცვისუნარიანობაზე. ქვეყანაში, რომელსაც დარღვეული აქვს ტერიტორიული მთლიანობა, რომელიც დგას ურთულესი რეგიონული გამოწვევების წინაშე, აღარ არსებობს ქვეყნის თავდაცვისუნარიანობისა და სამხედრო აღმშენებლობისთვის შექმნილი კონსტიტუციური ორგანო - უშიშროების საბჭო. შესაბამისად, ვიღებთ შესუსტებულ თავდაცვასა და არაინფორმირებულ, უფუნქციო უმაღლეს მთავარსარდალს“, - განაცხადა მიშველაძემ სამშაბათის ტრადიციულ ბრიფინგზე.

ანა მებურიშვილი