საზოგადოება

უზენაესი სასამართლოსთან რუსთავი 2-ის მხარდამჭერი აქცია მიმდინარეობს

უზენაესი სასამართლოს დიდმა პალატამ რუსთავი 2-ის საქმის განხილვა სავარაუდოდ უკვე დაიწყო.

დიდი პალატის შემადგენლობაში შემავალი მოსამართლეები უზენაესი სასამართლოს შენობაში უკვე 2 საათზე მეტია იმყოფებიან.

საქმის განხილვის დაწყების კონკრეტული საათი უცნობია, რადგან დიდი პალატა საქმეს განიხილავს ზეპირი მოსმენის გარეშე რაც იმას ნიშნავს, რომ განხილვას მხარეები არ დაესწრებიან.

დღესვე დიდმა პალატამ საქმეში მონაწილე მხარეების მიერ მოსამართლეთა აცილების შესახებ დაყენებული შუამდგომლობები უნდა განიხილონ.

პარალელურად სასამართლოს შენობასთან დილიდან მიმდინარეობს რუსთავი 2-ის მხარდამჭერი აქცია, რომელსაც მოსახლეობასთან ერთად პოლიტიკური პარტიების წარმომადგენლები ესწრებიან.

უზენაეს სასამართლოსთან მიმდინარე აქციაზე პოლიტიკოსების გარდა იმყოფებიან რიგით მოქალაქეები, ადამიანები, რომლებიც აცხადებენ, რომ რუსთავი 2-თან დაკავშირებით მიმდინარე საქმე პოლიტიკურად მოტივირებულია.

ნინო ექვთიმიშვილი