კომენტარი
უზნეობად მიმაჩნია, რომ პოლიტიკოსები ტრაგედიის დროს იწყებენ პოლიტიკური დივიდენდების მოგროვებას - ეკა ბესელია
პარლამენტის იურიდიულ საკითხთა კომიტეტის თავმჯდომარე, ეკა ბესელია უმცირესობას ელიავას ბაზრობაზე გაჩენილი ხანძრისა და მსგავსი ტრაგედიების საკუთარ თავზე მორგებაში ადანაშაულებს.
მისი თქმით, უზნეობაა, როდესაც პოლიტიკოსები დივიდენდების მოპოვებას დაზარალებულებზე მანიპულირებით ცდილობენ.
"უზნეობად მიმაჩნია, რომ პოლიტიკოსები ტრაგედიის დროს იწყებენ პოლიტიკური დივიდენდების მოგროვებას. ხდება პოლიტიკური მანიპულაცია. პოლიტიკა არ შეიძლება იყოს დაცლილი მორალური მხარისგან. მესმის კანდიდატების მძაფრი სურვილი, რომ ასეთი სიტუაცია სათავისოდ გამოიყენონ, მაგრამ მერწმუნეთ, რომ ასეთი რამ საზიანოდ მოქმედებს. როდესაც ადამიანს უჭირს და შენ პროცესში შენი ინტერესებით ერთვები, ეს არის სრულიად მიუღებელი", - განაცხადა ბესელიამ.
მისივე თქმით, ელიავას ბაზრობაზე გაჩენილი ხანძრის შესახებ არსებულ ყველა კითხვაზე პასუხი მხოლოდ გამოძიებამ უნდა გასცეს, დაზარალებულების დახმარება კი სასურველია დროულად მოხდეს.
ნინო ექვთიმიშვილი