საზოგადოება
ვაჟა-ფშაველას I კვარტალში სკვერის რეაბილიტაცია მიმდინარეობს
ვაჟა-ფშაველას I კვარტალში მდებარე სკვერში სარეაბილიტაციო სამუშაოები დაიწყო.
თბილისის საკრებულოს ინფორმაციით, აღნიშნული ვაკის მაჟორიტარი წევრის გიორგი ბირბიჩაძის წინასაარჩევნო დაპირებისამებრ ხდება.
ამასთან დაკავშირებით დეპუტატი ვაკის რაიონის გამგებელთან ნოდარ ტურძელაძესთან ერთად ადგილობრივ მოსახლეობას შეხვდა, დაგეგმილი პროექტის თაობაზე დეტალური ინფორმაცია მიაწოდა და მათი წინადადებები მოისმინა.
როგორც გიორგი ბირბიჩაძემ აღნიშნა, წარმოდგენილი პროექტის შესაბამისად დაიგება ასფალტის საფარი, განახლდება და მოეწყობა ბორდიურები. ასევე გამწვანდება აღნიშნული ტერიტორია, მოეწყობა ახალი დასასვენებელი სივრცე და საბავშვო გასართობი მოედანი, გაკეთდება საფეხმავლო ბილიკები და განათების სისტემა.
აღნიშნული სამუშაოები ვაკის რაიონის გამგეობის ინფრასტრუქტურული პროექტების ფარგლებში განხორციელდება.