პოლიტიკა

დემურ სტურუას თვითმკვლელობის საქმე არის ყველაზე მძიმე შემთხვევა, რომლის უპასუხოდ დატოვება მძიმე იქნება - დავით უსუფაშვილი

დემურ სტურუას თვითმკვლელობის საქმე არის ყველაზე მძიმე შემთხვევა, რომლის უპასუხოდ დატოვება და დამნაშავის არ ან ვერ დასჯა ყველასთვის ძალიან მძიმე იქნება - ამის შესახებ ჟურნალისტებს პარლამენტის თავმჯდომარემ დავით უსუფაშვილმა განუცხადა.

უსუფაშვილის თქმით, ქვეყანაში ჯერ კიდევ არის ისეთი გარემო, რომ მოქალაქეებში სამართალდამცავი ორგანოების მხრიდან ზეწოლის ფაქტები გაკვირვებას არ იწვევს.

,,მე მაწუხებს ის, რომ ამ ქვეყანაში ჯერ კიდევ არის ისეთი გარემო, რომ მსგავსი ფაქტები შესაძლებელია ხდებოდეს. საზოგადოებას მაინცა და მაინც არ გაჰკვირვებია, როდესაც მოისმინა, რომ სამართალდამცავი ორგანოების მხრიდან შესაძლოა ჰქონდა ადგილი რაღაც არაფორმალურ ზეწოლას თუ ურთიერთობას მოქალაქესთან. ამის გამო არ გაჩენილა კითხვები, ეს როგორ შეიძლება. სამწუხაროდ, ჯერ კიდევ გვაქვს ეს პრობლემა გადაუჭრელი“, - განაცხადა დავით უსუფაშვილმა.

22 წლის დემურ სტურუამ სამტრედიის რაიონის სოფელ დაფნარში 7 აგვისტოს სიცოცხლე თვითმკვლელობით დაასრულა. გარდაცვალებამდე ახალგაზრდამ წერილი დაწერა, სადაც პოლიციის მხრიდან მასზე განხორციელებულ ზეწოლაზე მიუთითებდა.

მარი ნამგალაძე