უახლესი ამბები
- 23.04.2024 15:47ჩემი აზრით, ის ხალხი, რომელიც ჩამოდის აქციაზე, ყველაზე საცოდავი ხალხია – იაგო ხვიჩია
- 23.04.2024 15:39საქართველოს ბანკის მხარდაჭერით, საქართველოში KIABI – ს პირველი ფილიალი გაიხსნა
- 23.04.2024 10:37ავტომანქანის ყალბი მართვის მოწმობების დამზადება-გასაღების ფაქტზე ოთხი პირი დააკავეს
- 23.04.2024 08:21აშშ-ის სახელმწიფო დეპარტამენტმა საქართველოში ადამიანის უფლებების შესახებ 2023 წლის ანგარიში გამოაქვეყნა
არქივი
მსოფლიო
ვარშავაში, წმინდა გრიგოლ ფერაძის სახელობის პრემია ქართველ მეცნიერს მიენიჭა
ვარშავის უნივერსიტეტში, წმინდა გრიგოლ ფერაძის პრემიის მიმნიჭებელმა საბჭომ, ქართველ მეცნიერს, ფილოლოგიის მეცნიერებათა დოქტორს, პროფესორს თამილა მგალობლიშვილს ქართველოლოგიური კვლევების განვითარებაში შეტანილი განსაკუთრებული წვლილისთვის (გარდაცვალების შემდეგ) წმ. გრიგოლ ფერაძის პრემია მიანიჭა.
ვარშავის უნივერსიტეტის პროფესორმა, წმინდა გრიგოლ ფერაძის პრემიის მიმნიჭებელი საბჭოს თავმჯდომარემ, დავით ყოლბაიამ „მედიანიუსთან“ საუბარში აღნიშნა, რომ ქალბატონმა თამილამ, რომელიც 1997 წლიდან ქართულ სიძველეთა მოძიებისა და კვლევის სამეცნიერო ცენტრს ხელმძღვანელობდა, მრავალი სამეცნიერო ექსპედიცია მოაწყო ისრაელში, იორდანიასა თუ თურქეთში ქართული მონასტერების, ხელნაწერების თუ ეპიგრაფიკის ნიმუშების გამოსავლენად. განსაკუთრებით მნიშვნელოვანია მისი ხელმძღვანელობით მოწყობილი ექსპედიცია ისრაელში 2001-2002 წ.წ, რომლის დროსაც წმინდა მიწის 40-მდე ეკლესია-მონასტერი გამოვლინდა, აღინუსხა და დაფიქსირდა 100-მდე ლაპიდარული თუ საღებავით შესრულებული ძველი ქართული წარწერა, აღმოჩნდა ქართული ხელნაწერები და საეკლესიო ნივთები.
თამილა მგალობლიშვილის ხელმძღვანელობით ქართულ ენაზე ითარგმნა და გამოიცა გრიგოლ ფერაძის „იერიქონის ვარდები“, წმინდა მიწასა და სირიაში მოგზაურობის დღიური. მეცნიერი 2005-20018 წლებში ვარშავის უნივერსიტეტის წმინდა გრიგოლ ფერაძის სამეცნიერო მემკვიდრეობის შესწავლის კომისიის თანათავმჯდომარე იყო.
წმინდა გრიგოლ ფერაძის სახელობის პრემია 2010 წელს ვარშავის უნივერსიტეტის ორიენტალისტიკის ფაკულტეტის ქართველოლოგიურ ჟურნალ „პრო გეორგიას“ საერთაშორისო საბჭოს ინიციატივით დაწესდა და მას ორ წელიწადში ერთხელ გასცემენ.
როგორც დავით ყოლბაიამ აღნიშნა, პრემია მის ლაურეატებს იმ ჰუმანიზმისა და ფასეულობებისთვის გადაეცემათ, რომელებსაც ისინი მთელი თავისი ცხოვრების განმავლობაში ამკვიდრებდნენ.
წმინდა გრიგოლ ფერაძის სახელობის პრემია წარმოადგენს X საუკუნის უძველესი ქართული ხელოვნების ნიმუშის მარტვილის პანაგიას ასლს, მარგალიტის თვლებით და მინანქარით მოხატული, ოქროსა და ვერცხლში მოოჭვილი, სადაც წმინდა. გრიგოლის ხატია გამოსახული.