საზოგადოება

ვფიქრობ, შევძლებთ, დედაქალაქს დავუბრუნოთ „ლაღიძის წყლები“ - კახა კალაძე

თბილისის მერმა, კახა კალაძემ არ გამორიცხა, რომ დედაქალაქს, კერძოდ, რუსთაველის გამზირს „ლაღიძის წყლები“ და ცნობილი სახაჭაპურე დაუბრუნდეს.

„ეს არის კერძო საკუთრება და ვფიქრობ, შევძლებთ, დედაქალაქს დავუბრუნოთ „ლაღიძის წყლები“ “, - თქვა დედაქალაქის მერმა.

კალაძემ აღნიშნა, რომ ამ ობიექტების დაბრუნება საინტერესო იქნება ტურისტებისთვის.

„ვისურვებდი, რომ ლაღიძის წყლები და სახაჭაპურე, რომელიც დაკარგა რუსთაველის გამზირმა, მოვახერხოთ და ბიზნესის უფლებების სრული დაცვით, გამოვისყიდოთ და განვაახლოთ. ეს არის ბევრი თბილისელის სურვილი. ეს მნიშვნელოვანი იქნება ტურისტებისა და იმ ადამიანებისთვის, ვისაც ახსოვს და განსაკუთრებული მოგონებები აკავშირებს ლაღიძის წყლებთან“, -თქვა კალაძემ.

„ლაღიძის წყლების“ ყოფილი შენობის დაბრუნებისა და განახლების ინიციატივა პრემიერ-მინისტრ გიორგი კვირიკაშვილს ეკუთვნის. მან გუშინ, სავაჭრო ცენტრ „გალერია თბილისის“ გახსნაზე სთხოვა კალაძეს, ბიზნესის უფლებების სრული დაცვით, გამოისყიდოს ძველი შენობა.

ანა მებურიშვილი