საზოგადოება

ვფიქრობ, უახლოეს დღეებში ეს პრობლემა საბოლოოდ იქნება გადაწყვეტილი - გიორგი მღებრიშვილი

შინაგან საქმეთა მინისტრის, გიორგი მღებრიშვილის ინფორმაციით, ბორჯომის ხეობაში ხანძრის ძირითადი კერები ლოკალიზებულია.

„დღეს უკვე საკმაოდ პოზიტიური ტენდენციები შეინიშნება. ყველა ძირითადი კერა ლოკალიზებულია. მიუხედავად ამისა, ყველა სამსახური, რომელიც აქ მობილიზებულია, განვაგრძობთ მუშაობას“, - უთხრა მინისტრმა ჟურნალისტებს.

მისი თქმით, აქცენტი გაკეთდება ცოცხალ ძალაზე, რადგან დარჩენილი ცეცხლის კერები ხელითაა დასამუშავებელი. მინისტრის ვარაუდით, პრობლემა რამდენიმე დღეში გადაიჭრება.

„ცოცხალი ძალის დამატება ჩვენ დაგვჭირდა იმიტომ, რომ ავიაციის ეფექტური მუშაობის შემდგომ ის წვრილ-წვრილი კერები, რომელიც არის დარჩენილი, არის უკვე ხელით დასამუშავებელი და ცოცხალმა ძალამ უნდა იმუშაოს. ჩვენ ინტენსიურად ვაგრძელებთ მუშაობას 24-საათიან რეჟიმში და ვფიქრობ, უახლოეს დღეებში ეს პრობლემა საბოლოოდ იქნება გადაწყვეტილი“, - განაცხადა მღებრიშვილმა.

შეგახსენებთ, მეექვსე დღეა ბორჯომის ხეობაში ცეცხლს აქრობენ. ბოლო ინფორმაციით, ძლიერი ქარის გამო 2 ახალი კერა გაჩნდა - არდაგანის სიახლოვესა და წაღვერის ფერდობზე. ავიაციამ არდაგანთან ხანძრის ძირითადი ნაწილი ჩააქრო, ხოლო წაღვერის ფერდობზე სამხედროები მუშაობენ.

ანა მებურიშვილი