პოლიტიკა

ვგეგმავ უკრაინის საზღვარი გადავკვეთო რომელიმე ევროპული სახელმწიფოს მხრიდან - მიხეილ სააკაშვილი

საქართველოს ყოფილმა პრეზიდენტმა და ოდესის ექს-გუბერნატორმა მიხეილ სააკაშვილმა განაცხადა, რომ ის აპირებს უკრაინის საზღვრის გადაკვეთას „რომელიმე ევროპული სახელმწიფოს“ მხრიდან, ხოლო უკრაინაში ჩასვლის ზუსტ თარიღს 16 აგვისტოს დაასახელებს.

ამის შესახებ მან ტელეარხ 24-თან ისაუბრა.

„დავბრუნდები უკრაინაში. ვგეგმავ, უკრაინის საზღვარი გადავკვეთო რომელიმე ევროპული სახელმწიფოს მხრიდან. სადმე სხვაგან მუდმივი საცხოვრებელი არ მაქვს არც ევროპაში, არც სხვაგან. ჩემი ყველა ნივთიც უკრაინაშია. ჩემი მეგობრების უმეტესობა და ის პარტია, რომელსაც ვხელმძღვანელობ, ყველა აქაა. მაზეგ დაბრუნების კონკრეტულ თარიღს დავასახელებ“, - განაცხადა სააკაშვილმა.

სააკაშვილმა აღნიშნა, რომ ევროპელ პოლიტიკოსებთან მოლაპარაკებებს აწარმოებს, რათა მათ უკრაინელებს მხარი დაუჭირონ.

„უკრაინელების უფლებების დაცვის პასუხისმგებლობა ავიღე. პოროშენკოსა და ოლიგარქებს ეს ძალიან არ უნდათ. მაგრამ მე მათი არ მეშინია. ახლა ხშირად ვაძლევ ინტერვიუებს ევროპულ მედიას, ვუყვები სიტუაციას. ასევე ვკონტაქტობ რიგ ევროპელ პოლიტიკოსებთან, მოვუწოდებ, მხარი დაუჭირონ უკრაინელ ხალხს“, - თქვა სააკაშვილმა.

შეგახსენებთ, 26 ივლისს გახდა ცნობილი, რომ მიხეილ სააკაშვილს უკრაინის მოქალაქეობა ჩამოართვეს. უკრაინის პრეზიდენტის ადმინისტრაციის თქმით, ამის მიზეზი გახდა სააკაშვილის მიერ უკრაინის მოქალაქეობის მისაღებად შესავსებ დოკუმენტებში არასწორი ინფორმაციის მიწოდება.

გუშინ კი ოდესის ყოფილმა გუბერნატორმა ფეისბუკის საკუთარ გვერდზე პირდაპირი ეთერი დაანონსა, სადაც ისაუბრებს „უკრაინაში დაბრუნებისა“ და „უკრანის უკრაინელებისთვის დაბრუნების“ გეგმაზე.