უახლესი ამბები
არქივი
პოლიტიკა
ვისურვებდი, რომ საქართველოს ისეთივე პრეზიდენტი ყავდეს, როგორიც პუტინია რუსეთისთვის - ნინო ბურჯანაძე (ვიდეო)
„დემოკრატიული მოძრაობის“ ლიდერის, ნინო ბურჯანაძის შეფასებით, საქართველოს ექს-პრეზიდენტის მიხეილ სააკაშვილისა და რუსეთის მოქმედი პრეზიდენტის ვლადიმირ პუტინის შედარება შეუძლებელია.
როგორც ბურჯანაძემ Dautche Welle-თვის მიცემულ ინტერვიუში აღნიშნა, პუტინი სერიოზული პოლიტიკოსია, რომელმაც იცის რა უნდა თავისი ქვეყნისთვის, სააკაშვილი კი იმპულსურია.
„სააკაშვილს და პუტინს არაც ერთი მიმართულებით არ შევადარებდი. პუტინი სერიოზული პოლიტიკოსია, სერიოზული ლიდერია, ადამიანია, რომელმაც იცის რა უნდა თავისი ქვეყნისთვის, რეალურად აკეთებს იმას, რაც მის ქვეყანას ჭირდება. სააკაშვილი კი იმპულსური ადამიანია. ის ფაქტიც, რომ პუტინის ხელისუფლებას როგორც ავტორიტარულს აკრიტიკებენ და სააკაშვილი დასავლეთში არავის არასდროს გაუკრიტიკებია - ჩემთვის ორმაგი სტანდარტების მაჩვენებელია.
არ ვამბობ, რომ რუსეთი დემოკრატიის სამოთხეა. ვფიქრობ, რომ რუსეთში არის დემოკრატიის პრობლემები, მაგრამ არ ვიტყოდი რომ ის ავტორიტარული ქვეყანაა. მე ვხედავ, რომ იქ არის მედიის წარმომადგენლებისთვის სიტყვის თავისუფლება. არამგონია, რომ მსოფლიოში აბსოლუტური დემოკრატია არსებობდეს. ვფიქრობ, რომ არჩევნებიც საქართველოზე უკეთესად ტარდება.
ვფიქრობ, რომ რუსეთისთვის იქნება კარგი თუ 2018 წლის საპრეზიდენტო არჩევნებში პუტინი გაიმარჯვებს, იმიტომ რომ ის თავისი ქვეყნისთვის ბევრ რამეს აკეთებს. მან მუხლებზე დაჩოქვილი ქვეყანა ფეხზე დააყენა.
ვისურვებდი რომ საქართველოში ისეთივე პრეზიდენტი ყავდეს, როგორიც პუტინია რუსეთისთვის. პუტინმა რუსეთისგან შექმნა სახელმწიფო, რომლის აზრს ითვალისწინებენ და მომავალშიც გაითვალისწინებენ“,-განმარტა პოლიტიკოსმა.
კითხვაზე, არის თუ პრეზიდენტის ყველაზე კარგი დამსახურება, რომ ის დროულად წავიდეს, ბურჯანაძემ უპასუხა : „არა“.
„პრეზიდენტის ყველაზე დიდი დამსახურებაა ქვეყნისთვის ყველაფერი გააკეთოს და ქვეყანა ფეხზე დააყენოს“,-აღნიშნა ბურჯანაძემ.
მონიკა დავლიანიძე