საზოგადოება

ვიწყებთ მოძრაობას იმ ადამიანებისთვის, ვინც ფიქრობს, რომ სახელმწიფომ დაჩაგრა, იძალადა მასზე და მოტყუებულია - ზვიად კუპრავა

„სამართალდამცავთა რეფორმირების ცენტრის“ ხელმძღვანელმა, ზვიად კუპრავამ დააანონსა, რომ იწყებს მოძრაობას ყველა იმ პირის დასახმარებლად, ვინც მიიჩნევს, რომ სახელმწიფომ დაჩაგრა ან მოატყუა.

კუპრავამ აღნიშნა, რომ შეიქმნება იმ ადამიანთა ბაზა, რომელსაც მთავრობას წარუდგენენ და შესაბამისი ნაბიჯების გადადგმას მოსთხოვენ.

„ამ წუთიდან ვიწყებთ მოძრაობას იმ ადამიანებისთვის, ვინც ფიქრობს, რომ სახელმწიფომ დაჩაგრა, იძალადა მასზე და მოტყუებულია. ჩვენ ვიწყებთ იმ ადამიანების რეგისტრაციას, ვინც არის სისტემის მსხვერპლი. რეგისტრაცია დაიწყება ორშაბათს, 11:00 საათიდან „სამართალდამცავთა რეფორმირების ცენტრში“, პეკინის #39 -ში. ველოდებით ყველას, ვინც არის ხელისუფლების მხრიდან ძალადობის მსხვერპლი. ჩვენ ყველასთვის ვიბრძოლებთ, რადგან როგორც საზოგადოება ხედავს, ქართულ პოლიტიკურ სპექტრს ამ ადამიანებისთვის არ სცალია. ჩვენ ვიღებთ პასუხისმგებლობას, რომ ბოლომდე ვიბრძოლოთ ამ ადამიანების უფლებების დასაცავად.

შევქმნით იმ პირების სრულ ბაზას, ვინც არის სისტემის მსხვერპლი. ამ სიას წარვუდგენთ მთავრობას და მოვთხოვთ, რომ ამ ხალხის საქმეების მიმართ გონივრულ ვადაში ხელშესახები ნაბიჯები გადაიდგას“,- განაცხადა კუპრავამ ხორავას ქუჩაზე მოკლული დავით სარალიძის მამასთან, ზაზა სარალიძესთან ერთობლივ პრესკონფერენციაზე.

კითხვაზე, რა მოხდება იმ შემთხვევაში, თუ მთავრობა მათ მოთხოვნებს არ შეასრულებს, კუპრავამ უპასუხა, რომ ამ ეტაპზე ამაზე არ ისაუბრებს.

„ჩვენ გვაქვს კონკრეტული სამოქმედო გეგმა, რომელსაც ეტაპობრივად გავაცნობთ საზოგადოებას. ამ ეტაპზე ამაზე არ ვისაუბრებთ, თუმცა ის ვადა, რომელსაც მივცემთ ხელისუფლებას, გპირდებით, რომ იქნება გონივრული“, -აღნიშნა კუპრავამ.

ანა მებურიშვილი