პოლიტიკა
ვიზალიბერალიზაციასთან დაკავშირებით თარიღების დასახელება არ არის სწორი - მიხეილ ჯანელიძე
საქართელოს საგარეო საქმეთა მინისტრ მიხეილ ჯანელიძის განცხადებით, ვიზალიბერალიზაციასთან დაკავშირებით თარიღების დასახელება არ არის სწორი.
ამის შესახებ ჯანელიძემ მთავრობის სხდომის დასრულების შემდეგ, რადიო თავისუფლების ჟურნალისტის, რიკარდ იოზვაკის მიერ გავრცელებული ინფორმაციის კომენტირებისას განაცხადა, რომლის მიხედვით, ევროკავშირი საქართველოს მოქალაქეებისთვის უვიზო რეჟიმს 2017 წლის 1-ელი იანვრიდან დააწესებს.
როგორც საგარეო საქმეთა მინისტრმა აღნიშნა, არ შეიძლება თარიღებით სპეკულირება.
„შეიძლება გარკვეულ ჟურნალისტს თავისი მოსაზრება ჰქონდეს, პოლიტიკოსებს კი თავისი. მნიშვნელოვანია ჩვენმა მოსახლეობამ იცოდეს, რომ პროცესები მიმდინარეობს ძალიან აქტიურად. აგვისტოს დასვენების პერიოდამდე განხილვები აქტიურად მიმდინარეობდა. გადაწყვეტილებები მიღებული იქნა შესაბამისი საპარლამენტო კომიტეტების მხრიდან, რაც ძალიან მნიშვნელოვანი იყო. ეს არის საერთაშორისო ურთიერთობების კომიტეტი, რომელმაც მიიღო პოზიტიური გადაწყვეტილება. ძალიან მნიშვნელოვანი იყო, რომ განხილვა მოხდა ასევე LIBE-ს კომიტეტში, რომელიც არის ძირითადი გადაწყვეტილების მიმღები კომიტეტი, სანამ ეს საკითხი პლენარულ სესიაზე გავა.
ველოდებით რომ, ამ პოზიტიური განხილვის შემდეგ, LIBE-ს კომიტეტი სექტემბრის დასაწყისში კენჭს უყრის აღნიშნულ გადაწყვეტილებას საქართველოსთან მიმართებაში და შემდეგ უკვე დაიწყება ის პროცედურები, რომელიც განსაზღვრულია ევროპული რეგულაციებით და სისტემით. ასევე საჭიროა საკითხი გავიდეს პლენარულ სესიაზე და მოხდეს კენჭისყრა. ამიტომ ეს პროცედურები მიმდინარეობს აქტიურად“, - განაცხადა ჯანელიძემ.
მისივე თქმით, ყველა ევროპელმა პოლიტიკოსმა გამოხატა აქტიური მხარდაჭერა საქართველოს ვიზალიბერალიზაციის საკითხისადმი.
„განცხადებები ვიზალიბერალიზაციის თარიღთან დაკავშირებით არ არის სწორი, რადგან ჩვენ მივყვებით პროცედურებს და პროცედურების შესაბამისად, დარწმუნებული ვარ, რომ პოზიტიურად დასრულდება საქართველოს ვიზალიბერალიზაციის საკითხი“, -განაცხადა მიხეილ ჯანელიძემ.
მონიკა დავლიანიძე