საზოგადოება
ზაფხულში ანაკლია-განმუხურის საკურორტო ზონაში კონცერტებს ორგანიზებას „Black Sea Arena“-ს მენეჯმენტ ჯგუფი გაუწევს
ზაფხულში ანაკლია-განმუხურის საკურორტო ზონაში კონცერტებს ორგანიზებას „Black Sea Arena“-ს მენეჯმენტ ჯგუფი გაუწევს. ინფორმაციას ამის შესახებ სამეგრელო-ზემო სვანეთის გუბერნატორის ადმინისტრაცია ავრცელებს.
აღნიშნულთან დაკავშირებით გუბერნატორის ადმინისტრაციაში სამუშაო შეხვედრა გაიმართა, რომელსაც გუბერნატორთან და ადგილობრივ თვითმმართველობის წარმომადგენლებთან ერთად ,,Black Sea Arena"-ს დირექტორი ანი კალელიშვილი ესწრებოდა.
სამეგრელო-ზემო სვანეთის გუბერნატორის განცხადებით, წელს ანაკლიაში ელექტრონული მუსიკის „ვიქენდებთან“ ერთად, სხვადასახვა სახის გასართობი და სპორტული ღონისძიებები გაიმართება.
"წლევანდელი სეზონი უნდა იყოს მაქსიმალურად დატვირთული, არამხოლოდ ერთი მიმართულებით, არამედ ეს უნდა იყოს ყველასთვის საინტერესო დასასვენებელი ადგილი. ანაკლიაში წელს ელექტრონული მუსიკის „ვიქენდებთან“ ერთად, სხვადასახვა სახის გასართობი და სპორტული ღონისძიებები გაიმართება. ჩვენ USAID-თან ერთად უკვე გადავამზადეთ ყველა საოჯახო ტიპის სასტუმრო და ისინი მზად არიან ახალი სეზონისთვის“ - განაცხადა გუბერნატორმა.
ანა კავლელიშვილის თქმით, „Black Sea Arena“-ს მენეჯმენტი პროფესიონალების გუნდთან ერთად მაქსიმუმს გააკეთებს, რომ ანაკლიაში ზაფხული საინტერესო და მიმზიდველი გახდეს.
"Check in Georgia-სთვის უმნიშვნელოვანესი რეგიონია სამეგრელო. ანაკლია- განმუხურის ტერიტორია უდიდეს პოტენციალს ატარებს, რათა ტურისტულად საინტერესო და მიმზოდველი გახადოს საქართველო. სწორედ ამიტომ „Black Sea Arena“-ს მენეჯმენტი პროფესიონალების გუნდთან ერთად მაქსიმუმს გააკეთებს, რომ ანაკლიაში 2018 წლის ზაფხული საინტერესო და მიმზიდველი გახდეს. როგორც ეკონომიკის მინისტრმა ბატონმა დიმიტრი ქუმსიშვილმა აღნიშნა 2019 წლიდან გამოცხადდება სახელმწიფოს მრავალწლიანი მხარდაჭერის პროგრამა, რაც ანაკლიისთვის ახალ ფესტივალს შექმნის."- ამბობს ანი კავლელიშვილი.
გუბერნატორის ადმინისტრაციის ინფორმაციითვე, ანაკლიაში, წელს, USAID-ის პროექტ ZRDA-სთან ერთად, ასევე ჩატარდება ბიზნესფესტივალი "ანაკლიობა", რომელიც რეგიონში ტურიზმისა და ბიზნესის განვითარებას შეუწყობს ხელს.
ცირა გუგრენიძე