პოლიტიკა
ზაზა შათირიშვილი და ბესიკ ლილუაშვილი საზმაუს ბორდის წევრები გახდნენ
პარლამენტმა საზოგადოებრივი მაუწყებლის სამეურვეო საბჭოს ორი ახალი წევრი აირჩია. ესენია უმრავლესობის მიერ წარდგენილი ზაზა შათირიშვილი, რომელსაც 103-მა დეპუტატმა დაუჭირა მხარი, და აჭარის ავტონომიური რესპუბლიკის კვოტით წარდგენილი კანდიდატი ბესიკ ლილუაშვილი 101 ხმით.
საპარლამენტო უმრავლესობას შათირიშვილის გარდა ბორდის წევრობის კიდევ ორი კანდიდატი ჰყავდა წაყენებული: ია მამალაძე და მალხაზ ასლამაზაშვილი. მამალაძემ 74 ხმა მიიღო, ხოლო ასლამაზაშვილმა - 16, რაც მათთვის არასაკმარისი აღმოჩნდა.
რაც შეეხება უმცირესობის მიერ წარდგენილ ნინია კაკაბაძეს, მის კანდიდატურას პარლამენტმა მხარი არ დაუჭირა.
ასევე ვაკანტურია ომბუდსმენის კვოტით ასარჩევი კანდიდატის ადგილი. თავდაპირველად სახალხო დამცველმა ნინო ლომჯარიამ თავის კანდიდატად სიდა-ს ყოფილი აღმასრულებელი დირექტორი, ზვიად დევდარიანი წარადგინა, თუმცა მას შემდეგ, რაც ათამდე ქალმა დაადანაშაულა ის სექსუალურ შევიწროებაში, დევდარიანმა თავისი კანდიდატურა მოხსნა. ომბუდსმენის კვოტით ასარჩევ კანდიდატზე კონკურსი გამოცხადდება
საზოგადოებრივი მაუწყებლის სამეურვეო საბჭოს შესარჩევმა კომისიამ 4 ვაკანტური ადგილის დასაკავებლად რეკომენდაცია 12 კანდიდატს მისცა.