რეგიონები
ზუგდიდის მერიის აკრძალვის მიუხედავად გარემოვაჭრეებმა მუშაობა განაახლეს
ზუგდიდის ბაზრის მიმდებარე ტერიტორიაზე გარემოვაჭრეებმა მერიის აკრძალვის მიუხედავად მუშაობა თვითნებურად განაახლეს. ადგილზე მობილიზებულმა პოლიციამ მათ სიტყვიერი გაფრთხილება მისცა, რომ ტერიტორია დატოვონ. სამართალდამცველებმა ერთი პირი დააკავეს, ხოლო ერთი მოვაჭრე შეუძლოდ გახდა და სასწრაფო სამედიცინო დახმარების სამსახურმა ზუგდიდის რეფერალურ საავადმყოფოში გადაიყვანა.
მოვაჭრეების თქმით, გარევაჭრობა მათი შემოსავლის ერთადერთი წყაროა და ისინი უკვე სამი დღეა ულუკმაპუროდ არიან დარჩენილები.
მათივე მტკიცებით, ისინი არ შევლენ მერიის მიერ შეთავაზებულ ალტერნატიულ ფართებზე.
30 იანვარს, გვიან ღამით, ზუგდიდიდს მერიის ზედამხედველობის სამსახურმა გარემოვაჭრეთა დახლები აიღო. ტერიტორიის დატოვების შესახებ გარემოვაჭრეები რამდენიმე დღის წინ გააფრთხილეს.
გარევაჭრობის აკრძალვასთან დაკავშირებით ქალაქის მერსა და გარემოვაჭრეებს შორის 24 იანვარს შეხვედრა გაიმართა. მერმა არ დააკმაყოფილა გარემოვაჭრეთა მოთხოვნა, რომ მაისამდე გარევაჭრობის უფლება მიეცა.