სამართალი
ზუგდიდში, ნარკოტიკული საშუალების შეძენა-შენახვის ბრალდებით ბერ-მონაზონი დააკავეს
შსს ზუგდიდის პოლიციის სამმართველოს თანამშრომლებმა ათონის მთაზე მოღვაწე ბერი გ. ქ. დააკავეს. გამოძიება მას დიდი ოდენობით ნარკოტიკული საშუალების ფლობას ედავება.
შსს-ს ინფორმაციით, აღნიშნულ საქმესთან დაკავშირებით დაკავებულია კიდევ ერთი პირი რ. მ. გამოძიება 260-ე მუხლით მიმდინარეობს, რაც ნარკოტიკული საშუალებების უკანონო შეძენა-შენახვას გულისხმობს.
ბერ-მონაზვნის ადვოკატი ჯიტა გულუა ამბობს, რომ სასულიერო პირი თითონ გამოცხადდა პოლიციაში და ამბობს, რომ ნარკოტიკული საშუალება მას ეკუთვნის.
"ორი დღის წინ დააკავეს ერთი პიროვნება, რომელიც აცხადებს, რომ ნარკოტიკული საშუალება ეკუთვნის მას. დაკავების მომენტში ჩანთა ეკავა იმ პიროვნებას და სხვა ნივთიერებთან ერთად აღმოჩენილი იყო ნარკოტიკული საშუალება მეტადონი. დღეის მდგომარეობით ოდენობა გარკვეულია, ექსპერტიზის დასკვნა უკვე არის წარმოდგენილი, ოდენობა გახლვათ 14, 5. რაც შეეხება მამაოს, წუხელ მამაო აღიარებითი ჩვენებით გამოცხადდა პოლიციაში და ამბობს, რომ ნარკოტიკული საშუალება არ ეკუთვნის იმ პიროვნებას,ამბობს, რომ არის მისი. მიუხედავად იმისა რომ ბრალის აღიარებით გამოცხადდა, ის დააკავეს იმ საფუძვლით, რომ თითქოსდა არსებობს მიმალვის საფრთხე. რას შეეხება იმ გარემოებას, ვის ეკუთვის ნარკოტიკული საშუალება, დღეის მდგომარეობით ნამდვილად არ არის დადგენილი ნარკოტიკული საშუალების კუთვნილება რომელიმე პიროვნებისადმი. ეს გამოძიების პრეროგატივაა და ბუნებრივია ეს გაირკვევა", - აცხადებს ადვოკატი.
შინაგან საქმეთა სამინისტროში აცხადებენ, რომ მომხდარზე გამოძიება სისხლის სამართლის კოდექსის 260-ე მუხლით მიმდინარეობს, რაც ნარკოტიკული საშუალებების უკანონო შეძენა-შენახვას ითვალისწინებს.