სამართალი
ზვიად დევდარიანი რვა ქალს ღირსებისა და პატივის შელახვისთვის უჩივის
„სიდას“ ყოფილი აღმასრულებელი დირექტორი ზვიად დევდარიანი სასამართლოს მიმართავს და რვა ქალს ღირსებისა და პატივის შელახვისთვის უჩივის.
მისი განცხადებით, სექსუალური შევიწროების ბრალდებით კამპანია მხოლოდ იმიტომ აუგორეს, რომ საზოგადოებრივი მაუწყებლის ბორდის წევრი არ გამხდარიყო.
დევდარიანის ადვოკატის დიმიტრი გაბუნიას ინფორმაციით, მომზადებულ სარჩელში მოხვდება საზოგადოებრივი მაუწყებლის ბორდის მოქმედი წევრი ნინია კაკაბაძე.
ნინია კაკაბაძე საზოგადოებრივი მაუწყებლის სამეურვეო საბჭოს წევრად პარლამენტის ფრაქცია „ევროპულმა საქართველომ“ წარადგინა, ზვიად დევდარიანი სახალხო დამცველის კვოტით მონაწილეობდა. თავად კაკაბაძისთვის გაუგებარია, რა კვეთა ჰქონდა მას დევდარიანთან, რადგან ნებისმიერი არჩევანის შემთხვევაში მას დევდარიანით ვერ ჩაანაცვლებდნენ.
სარჩელში სავარაუდოდ, ასევე მოხვდება ბაია პატარაიაც, რომელიც ზვიად დევდარიანის მხრიდან შესაძლო ძალადობისა და ადევნების ფაქტებზე ღიად საუბრობდა.
ზვიად დევდარიანი და მისი ინტერესების დამცხველი აცხადებენ, რომ ქალებს, რომლებიც „სიდას“ ყოფილ აღმასრულებელ დირექტორს სექსუალურ შევიწროებასა და ადევნებაში ადანაშაულებენ, საჩივარში არაფერი კონკრეტული არ მიუთითებიათ და საქმეში მტკიცებულებები არ არსებობს.