საზოგადოება

ზვიად კუპრავა სამძიმარზე იყო მოსული და მითხრა, ზაზა, თუ არ გეწყინება, მე ჩემებურად გამოვიძიებ ამ საქმეს - ზაზა სარალიძე

ხორავას ქუჩაზე მოკლული დავით სარალიძის მამამ, ზაზა სარალიძემ ამ საქმის გამოძიებაში მისი მეგობრის, უფლებადამცველის, ზვიად კუპრავას დამსახურება აღნიშნა.

სარალიძემ განაცხადა, რომ კუპრავა როგორც შსს-მ, ასევე საგამოძიებო კომისიამ უნდა დაკითხოს.

„თავიდან ვენდობოდი პროკურატურას და ვფიქრობდი, პროკურატურა საქმეს მიიყვანდა ბოლომდე, რაშიც ძალიან შევცდი. კუპრავა პირდაპირ გავიდა ბორის კაკუბავაზე, ეჭვი გაუჩნდა, რომ ეს იყო ის ბაბუა, რაზეც გვქონდა მერე საუბარი. სხვათა შორის, სტატუსიც დავწერე იმასთან დაკავშირებით, რომ შსს-მ დაუყონებლივ დაიბაროს ზვიად კუპრავა და დაკითხოს ამ საქმესთან დაკავშირებით, მაგრამ არ ვიცი, დაკითხეს თუ არა. იმედია, თქვენც დაკითხავთ და დაწვრილებით თვითონ ისაუბრებს დანარჩენ დეტალებზე”, – განაცხადა სარალიძემ.

სარალიძემ დაამატა, რომ სწორედ კუპრავამ გაარკვია, რომ პროკურატურის ყოფილი თანამშრომელი მირზა სუბელიანი ფლობდა ინფორმაციას ვანო მერაბიშვილის ციხიდან გაყვანის შესახებ.

„ესეც ზვიად კუპრავას აღმოჩენაა, ვანო მერაბიშვილის გაყვანის კადრებთან დაკავშირებით, ინფორმაციას ფლობს მირზა სუბელიანი. ზვიად კუპრავამ უფრო დაზუსტებით იცის ეს. ფაქტია, რომ მირზა სუბელიანის ინტერესებს იცავდა პროკურატურა და ითვალისწინებდა ყველაფერს.

თავდაპირველად მირზა სუბელიანი რომ თანამდებობის პირი იყო, ეს მე არ ვიცოდი. ზუსტად 2 დეკემბერი იყო, როდესაც ჩემი შვილი მოასვენეს სახლში, ზვიად კუპრავაც სამძიმარზე იყო მოსული და მითხრა ასეთი რამ, რომ ზაზა, თუ არ გეწყინება, მე ჩემებურად გამოვიძიებ ამ საქმეს. რატომ უნდა მეწყინოს, ან რატომ უნდა მეთქვა უარი. ამის შემდეგ ხშირი კომუნიკაცია გვქონდა. ზვიად კუპრავამ მითხრა, რომ ერთ-ერთი ბავშვი იყო პროკურატურის მაღალჩინოსნის შვილი. შემდეგ დადგინდა ნათესაური კავშირი კალანდიებთან. პირველი დღიდან ვიცოდი, რომ მ.კ. ჩხუბის მონაწილე იყო და არა მარტო ჩხუბის, არამედ ჩემი შვილის დაჭრის მონაწილე იყო”, – განაცხადა სარალიძემ.