საზოგადოება

ზვიად რატიანზე გასული სიუჟეტი საზოგადოებრივი მაუწყებლის ბორდისთვის მიუღებელი იყო - გრიგოლ გოგელია

„საზოგაოდებრივი მაუწყებლის“ ბორდის თავმჯდომარის გრიგოლ გოგელიას განცხადებით, არხზე პოეტ ზვიად რატიანის საქმეზე გასული სიუჟეტი ბორდისთვის მიუღებელია.

„ბორდი მიიჩნევს, რომ სიუჟეტი, რომელმაც გამოიწვია საზოგადოებრივი აღშფოთება და რეზონანსი, ჩვენთვისაც მიუღებელი იყო. ის სტანდარტები, რომლის მიხედვითაც „საზოგადოებრივი მაუწყებელი“ უნდა მუშაობდეს, დაირღვა. აქვე დავსძენ, რომ მაუწყებელი არ არის მხოლოდ ბორდისა და მენეჯმენტის მაუწყებელი. ჩვენ საზოგადოებას მივეცით ის მექანიზმი, რომ თუ რაიმე სიუჟეტის ან არამართებული პროდუქციის გაშვება მოხდება, ამაზე შეუძლია იმსჯელოს სპეციალურმა ინსტიტუტებმა მაუწყებელში და მიიღონ გადაწყვეტილება“, - თქვა გოგელიამ სამეურვეო საბჭოს სხდომაზე.

27 დეკემბერს ზვიად რატიანის საქმეზე სასამართლო სხდომა გაიმართა, რომელზეც შსს-მ პოლიციელების მიერ ჩაწერილი აუდიომტკიცებულება წარადგინა, სადაც ისმოდა, როგორ აგინებს პოეტი სამართალდამცველებს.

საზოგადოებრივმა მაუწყებელმა აღნიშნული ვიდეო შსს-სგან ოფიციალურად გამოითხოვა და გაავრცელა. ვიდეო დამონტაჟებულია და სრულად არ ასახავს დაკავების პროცესს, არც იმას, თუ რამ გააღიზიანა ზვიად რატიანი.

ვიდეოს გასაჯაროებამ ნეგატიური რეაქცია გამოიწვია საზოგადოების ნაწილში და განხილვის თემა გახდა სოციალურ ქსელებში. მწერლებისა და ცნობილი ადამიანების ნაწილმა ამის გამო საზოგადოებრივ მაუწყებელს ბოიკოტი გამოუცხადა.

ზვიად რატიანი 24 დეკემბრის ღამეს, საპოლიციო შემოწმების დროს დააკავეს. მას ედავებიან ხულიგნობასა და პოლიციის მიმართ დაუმორჩილებლობაში, ხოლო თავად პოეტი ამბობს, რომ სამართალდამცველებმა მასზე ფიზიკურად და ფსიქოლოგიურად იძალადეს.

ამ ინციდენტის გამო შინაგან საქმეთა სამინისტროს გენერალურმა ინსპექციამ გამოძიების დასრულებამდე მხოლოდ ერთ პოლიციელს შეუჩერა უფლებამოსილება.

ანა მებურიშვილი