პოლიტიკა

ჯანდაცვის სამინისტროს ახალი სამსახური თანამშრომელთა მუშაობის მონიტორინგს განახორციელებს

ჯანდაცვის სამინისტროში ახალი სამსახური შეიქმნება, რომელიც თანამშრომელთა მუშაობის მონიტორგს განახორციელებს.

როგორც ჟურნალისტებს ჯანდაცვის მინისტრმა, დავით სერგეენკომ მთავრობის დღევანდელი სხდომის დასრულების შემდეგ განუცხადა, სწორედ აღნიშნული სამსახურის შეფასების შედეგად გაეზრდება ან შეუმცირდება ანაზღაურება თანამშრომელთა ნაწილს.

„ახალ ბიუჯეტთან დაკავშირებით ჩვენი პირველადი ამოცანა არ არის, რომ დავიწყოთ კადრების შემცირება. ჯანდაცვის სამინისტროს ბევრი მნიშვნელოვანი რეფორმა ექნება გასატარებელი. ჩვენ ვააქტიურებთ ახალ სამსახურს, რომლის ამოცანა იქნება თანამშრომელთა მუშაობის მონიტორინგი, რაოდენობრივი შეფასება და მე ვფიქრობ, რომ მინუს 10%-იანი ჯამური სახელფასო ანაზღაურების შემცირება არათანაბრად გადანაწილდება. მასზე, ვინც უფრო მაღალ შედეგს დადებს, არამც თუ არ იმოქმედებს შემცირება, არამედ უფრო მაღალ ანაზღაურებას მიიღებს და პირიქით, ანუ ამოცანა არის მუშაობის ეფექტიანობის მიხედვით ხელფასის სამართლიანი გადანაწილება და არა რუტინული მინუს 10% ან მიზანმიმართული შემცირებები“, - განაცხადა დავით სერგეენკომ.

ნინო ექვთიმიშვილი