რეგიონები

მარტვილში `ქართული ოცნების` მერობის კანდიდატის საარჩევნო შტაბი ათ საარჩევნო უბანზე ხმების გადათვლას ითხოვს

"ქართული ოცნება- დემოკრატიული საქართველოს" მარტვილის მერობის კანდიდატის ალექსანდრე გრიგალავას საარჩევნო შტაბმა საოლქო საარჩევნო კომისიაში საჩივარი შეიტანა.

როგორც მარტვილის 65-ე საოლქო საარჩევნო კომისიის თავმჯდომარემ გრიგოლ ბართაიამ პირველ არხთან საუბრისას განაცხადა, ალექსანდრე გრიგალავას შტაბი ათ საარჩევნო უბანზე ხმების გადათვლას ითხოვს. საჩივარს საოლქო კომისია ხვალ განიხილავს.

წინასწარი მონაცემებით, მარტვილის 65-ე საარჩევნო ოლქში მერის არჩევნების მეორე ტურია. მეორე ტურში მონაწილეობას მიიღებენ პირველ ადგილზე გასული "ქართული ოცნების" მერობის კანდიდატი ალექსანდრე გრიგალავა, მან ხმების 49.7 პროცენტი მიიღო და "ნაციონალური მოძრაობის" მერობის კანდიდატი მამუკა დანელია. მას 36 პროცენტი აქვს.

ნინო ექვთიმიშვილი