ეკონომიკა

მინდა, მოვუწოდო მოსახლეობას, რომ არ იზარალონ- ნოდარ ხადური

ფინანსთა მინისტრი ნოდარ ხადური ეროვნული ვალუტის გამყარებას ელოდება და ამბობს, რომ ლარის კურსთან დაკავშირებით ცუდი მოლოდინების საფუძველი არ არსებობს.

,,ეკონომიკური პარამეტრები არ არის შეცვლილი, პირიქით გაუმჯობესებულია. მათ შორის გაუმჯობესებულია ჩამორიცხვები, რემიტენსები, რომელიც მანამდე შემცირებული იყო. იმპორტს აქვს შემცირების ტენდენცია, რაც ასევე მნიშვნელოვანია.

გარდა ამისა, მე მინდა გითხრათ, რომ მთავრობის ანგარიშებზე იქნება დადებითი ცვლილებები დოლარის თვალსაზრისით დეკემბერში. ნოემბრის ბოლოს, დეკემბერში ჩამოირიცხება აზიის განვითარების ბანკიდან თანხები. ვფიქრობ, რომ ეს არის მართლაც ძალიან დროებითი და უახლოეს მომავალში უნდა ველოდოთ კურსის გამყარებას. აუცილებლად გამყარდება კურსი.

სამწუხაროდ, ჩვენი ოპონენტები ყველანაირად ცდილობენ, რომ შექმნან ცუდი მოლოდინები, თუმცა მინდა გითხრათ, რომ ცუდი მოლოდინების არანაირი საფუძველი არ არსებობს მაკროეკონომიკურად და ეს ყველაფერი არაერთხელ გაჟღერებულა როგორც ეროვნული ბანკის მხრიდან, ისე ჩვენი მხრიდანაც. ამიტომ, მინდა, კიდევ ერთხელ მოვუწოდო მოსახლეობას, რომ არ იზარალონ’’, - განაცხადა ნოდარ ხადურმა მთავრობის სხდომის დასრულების შემდეგ.

ნინო ექვთიმიშვილი