საზოგადოება

საქართველოს კომუნიკაციების ეროვნული კომისია ნტვ+-ს ავტორიზაციას შეუჩერებს, თუკი ის არ წარუდგენს ამონაწერს საქართველოს მეწარმეთა და არასამეწარმეო იურიდიული პირების რეესტრიდან

საქართველოს კომუნიკაციების ეროვნული კომისია ნტვ+-ს წერილობით მიმართავს, რომ კომისიაში წარდგენილ დეკლარაციას საქართველოს მეწარმეთა და არასამეწარმეო იურიდიული პირების რეესტრიდან ამონაწერი დაურთოს, წინააღმდეგ შემთხვევაში რუსულ კომპანიას ავტორიზაცია შეუჩერდება.

კომისიის ინფორმაციით, НТВ-плюс-მა საქართველოს კანონმდებლობის შესაბამისად რეგისტრაცია გაიარა 2016 წლის 12 სექტემბერს და მიიღო ავტორიზაცია.

„კომუნიკაციების კომისიაში დანერგილი პრაქტიკის მიხედვით, პროცედურულად ნებისმიერი დაინტერესებული პირი მარტივი ავტორიზაციის საშუალებით ავსებდა დეკლარაციას, მათ შორის უცხოური კომპანიის წარმომადგენელი და თუ ის კანონით გათვალისწინებულ ყველა დოკუმენტს წარადგენდა, ავტომატურად იღებდა ავტორიზაციას“,- წერია კომისიის განცხადებაში.

ავტორიზაციის გავლისას ნტვ+-მა წარადგინა შემდეგი დოკუმენტები: ღია სააქციო საზოგადოება „ნტვ-პლუსის“ წესდება; ღია სააქციო საზოგადოება „ნტვ-პლუსის“ ამონაწერი რუსეთის იურიდიულ პირთა ერთიანი სახელმწიფო რეესტრიდან; კომპანიის გენერალური დირექტორის მიხეილ დიომინის სახელზე გაცემული რუსეთის ფედერაციის პასპორტის ასლი; მინდობილობა რუსუდან გოგინავას სახელზე. დოკუმენტაცია ნათარგმნია ქართულ ენაზე და დამოწმებულია ნოტარიულად.

კომუნიკაციების ეროვნული კომისიის თქმით, დღეისთვის ეს მიდგომა შეიცვალა და უცხოურ კომპანიას მხოლოდ ავტორიზაციის საფუძველზე არ შეუძლია საქმიანობის დაწყება. ქართულ ბაზარზე შესასვლელად უცხოურმა კომპანიამ სამეწარმეო რეესტრში უნდა გაიაროს რეგისტრაცია, რეგისტრაციის დამადასტურებელი მოწმობა კი, საქართველოს კომუნიკაციების ეროვნულ კომისიაში წარადგინოს.

„კომუნიკაციების ეროვნულმა კომისიამ კომპანია შპს „VOXBONE“-ს, რომელსაც ელექტრონული კომუნიკაციების სფეროში საქმიანობაზე კანონმდებლობის შესაბამისად გავლილი ჰქონდა ავტორიზაცია, უკვე მიმართა წერილობით და მოთხოვა დამატებითი დოკუმენტაციის წარმოდგენა, წინააღმდეგ შემთხვევაში, მას ავტორიზაცია შეუჩერდება. კომუნიკაციების კომისია „ნტვ+“ს ისევე, როგორც შპს „VOXBONE“-ს, მიმართავს წერილით, რომ კომისიაში წარმოდგენილ დეკლარაციას დაურთოს ამონაწერი საქართველოს მეწარმეთა და არასამეწარმეო იურიდიული პირების რეესტრიდან, დოკუმენტაციის წარმოუდგენლობის შემთხვევაში, „ნტვ+“-საც შეუჩერდება ავტორიზაცია“, – წერია კომუნიკაციების ეროვნული კომისიის განცხადებაში.

ცნობისთვის, აშშ-ის ფინანსთა სამინისტროს სასანქციო სიაში შეყვანილი რუსეთის უმსხვილესი მედიაჰოლდინგი „გაზპრომ-მედია“ ქართულ სატელევიზიო ბაზარზე შემოდის. ჰოლდინგი იმაუწყებლებს საქართველოში NTV-PLUS-ის ბრენდის სახელით.