საზოგადოება

13 ივნისის სტიქიის შედეგად დაზარალებული 6 ოჯახი თბილისის მერიისგან კომპენსაციას უკვე 2 წელია ელოდება

13 ივნისის სტიქიის შედეგად დაზარალებული 6 ოჯახის მტკიცებით, თბილისის მერიისგან კომპენსაციას უკვე 2 წელია ელოდებიან.

ამასთან, როგორც დაზარალებულებმა არასამთავრობო ორგანიზაცია 42-ე მუხლის ოფისში პრესკონფერენციაზე განაცხადეს, საცხოვრებელი ბინის ქირის ფულს 800 ლარს თბილისის მერია უხდის.

როგორც დაზარალებულები ამბობენ, თბილისის მერიის მიერ შეთავაზებული კომპენსაცია მათი განადგურებული უძრავი ქონების ღირებულების ათ პროცენტს შეადგენს და ბევრად ნაკლებია სხვა დაზარალებულებისათვის გაცემულ კომპენსაციაზე.

მათივე თქმით, 2010 წლამდე ფინანსური პრობლემების გამო, ხოლო 2010 წლის შემდეგ, პრეზიდენტის მიერ ტერიტორიისთვის რეკრეაციული ზონის სტატუსის მინიჭების გამო ვერ დაირეგისტრირეს ბინები.

დაზარალებულების ცნობით, კანონი მათაც ისეთ უფლებებს ანიჭებს, როგორსაც იმ ადამიანებს, რომლებსაც ბინები დარეგისტრირებული აქვთ.

მათივე ინფორმაციით, თბილისის საქალაქო სასამართლომ დააკმაყოფილა დაზარალებულების მოთხოვნა, რომლის მიხედვითაც კომპენსაციები ისეთივე წესით უნდა მიეღოთ, როგორც რეგისტრირებული ქონების მესაკუთრეებმა მიიღეს, თუმცა გადაწყვეტილება მერიამ სააპელაციო სასამართლოში გაასაჩივრა.

ნინო ექვთიმიშვილი