საზოგადოება

2-დან 7 წლამდე ბავშვებს სისხლში ტყვიის შემცველობას შეუმოწმებენ - ამირან გამყრელიძე

დაავადებათა კონტროლის ეროვნული ცენტრი მოსახლეობას მოუწოდებს, მაქსიმალურად ჩაერთონ კვლევაში, რომელსაც გაეროს ბავშვთა ფონდთან ერთად ატარებენ.

როგორც დღევანდელ პრესკონფერენციაზე დაავადებათა კონტროლის ეროვნული ცენტრის დირექტორმა, ამირან გამყრელიძემ განაცხადა, კვლევამ უნდა დაადგინოს ტყვიის შემცველობა სისხლში.

გამოკვლევა შერჩევითობის პრინციპით, 2-დან 7 წლამდე ასაკის ბავშვებს უტარდებათ.

გამყრელიძის თქმით, კვლევა საქართველოს 10 ქალაქში მიმდინარეობს და 1 500 ბავშვს უნდა ჩაუტარდეს. აქედან 1 300-მდე ბავშვს ანალიზები უკვე აუღეს.

„მინდა, მივმართო საქართველოს მოსახლეობას, რომ ხელი შევუწყოთ ამ კვლევას, რამეთუ ჩვენ გარკვეული ჩამორჩენა ჩართვაში გვაქვს ზოგიერთ რეგიონში, მათ შორის, დედაქალაქშიც,“ -განაცხადა დაავადებათა კონტროლის და საზოგადოებრივი ჯანმრთელობის ეროვნული ცენტრის გენერალურმა დირექტორმა, ამირან გამყრელიძემ.

კვლევის შედეგები გაზაფხულზე იქნება ცნობილი.