საზოგადოება

„აიცერით! მეორე წელიწადზე მეტია წითელა ვერ მოვიშორეთ“ - ემუქრება თუ არა ეპიდემია საქართველოს

ჯანდაცვის მსოფლიო ორგანიზაციის (WHO) განცხადებით, წითელას ინფექცია ევროპის ისეთ ოთხ ქვეყანაში დაბრუნდა, სადაც ინფექცია უკვე აღმოფხვრილი იყო. ამის შესახებ ინფორმაციას BBC ავრცელებს.

დაავადება აღარ იყო გავრცელებული ალბანეთში, ჩეხეთში, საბერძნეთსა და დიდ ბრიტანეთში. "ჩვენ უკან-უკან მივდივართ, არასწორ გზაზე ვართ", - განაცხადა ჯანდაცვის მსოფლიო ორგანიზაციის იმუნიზაციის დეპარტამენტის წარმომადგენელმა ქეით ობრაიენმა.

წითელა გადამდები ინფექცია და პოტენციურად ფატალური დაავადებაა, რომელიც იწვევს ხველას, გამონაყარს და ცხელებას. მისი პრევენცია შესაძლებელია MMR ვაქცინის ორი დოზით, რომელიც დიდ ბრიტანეთში ყველა მცირეწლოვანი ბავშვისთვის უფასოა.

ქვეყანა ინფექციისგან თავისუფლად მიიჩნევა, თუ 12 თვის განმავლობაში კონკრეტულ გეოგრაფიულ არეალში ინფექციის ენდემური გადაცემა არ ფიქსირდება.

2019 წლის პირველი ექვსი თვის შემდეგ, გასული წლის ანალოგიურ პერიოდთან შედარებით, მსოფლიოში წითელათი დაავადებულთა რაოდენობა სამჯერ გაიზარდა. ამის შესახებ ინფორმაცია ჯანდაცვის მსოფლიო ორგანიზაციის (WHO) ანგარიშში წერია, რომელიც 12 აგვისტოს გამოქვეყნდა.

რა მდგომარეობაა საქართველოში და ემუქრება თუ არა საფრთხე ჩვენს ქვეყანას?

დაავადებათა კონტროლისა და საზოგადოებრივი ჯანმრთელობის ეროვნული ცენტრის სამეცნიერო ხელმძღვანელი პაატა იმნაძე შემოდგომიდან წითელას ვირუსის მატებას ვარაუდობს და მოსახლეობას ვაქცინაციისკენ მოუწოდებს:

"მთელი ეს პერიოდია აქტიურად ვეუბნებით მოსახლეობას - წითელა, წითელა... ვიხვეწებით, მოვუწოდებთ მათ ვაქცინაციისკენ, აიცერით! მეორე წელიწადზე მეტია წითელა ვერ მოვიშორეთ. შემოდგომაზე იგiვე ვარიანტია, რომ ისევ მოიმატოს. მასობრივად უნდა მოხდეს ვაქცინაცია. თუ მასობრივად არ მოხდა აცრა ეს არ გაჩერდება. ვინც აცრილია მას არ დაემართება", - თქვა იმნაძემ.