მსოფლიო

ალტერნატივა არ გვქონდა - ტერეზა მეი

დიდი ბრიტანეთის პრემიერ-მინისტრმა ტერეზა მეიმ კოალიციური ძალების მიერ სირიაზე განხორციელებულ იერიშზე განმარტება გააკეთა და განაცხადა, რომ ამ ქმედებას „ალტერნატივა არ ჰქონდა“.

„ასე გავაკეთეთ, რადგან ეს ქმედება შედის ბრიტანეთის ინტერესებში. ვერ დავუშვებთ, რომ ნორმალიზებული იყოს ქიმიური იარაღის გამოყენება სირიაში, დიდი ბრიტანეთის ქუჩებსა თუ სადმე სხვაგან მსოფლიოში. ვამჯობინებდით ალტერნატიულ ნაბიჯს, მაგრამ ამ შემთხვევაში ის არ ყოფილა“, -თქვა მეიმ.

ბრიტანეთის პრემიერმა აღნიშნა, რომ იერიშის განხორციელებაზე გადაწყვეტილების მიღება ადვილი არ ყოფილა. მან დაამატა, რომ იერიშის მიტანა „სწორი და კანონიერი“ გადაწყვეტილება იყო.

მეიმ სამხედრო ძალები გააგზავნა სირიაში პარლამენტის ნებართვის გარეშე, რის გამოც ოპოზიციონერი დეპუტატები ვარაუდობენ, რომ ამით პრემიერმა კანონი დაარღვია.

აშშ-ის პრეზიდენტმა დონალდ ტრამპმა სირიაზე იერიშის მიტანის ბრძანება გასცა. დღეს გამთენიისას კოალიციურმა ძალებმა, რომლებშიც შედიან აშშ, დიდი ბრიტანეთი და საფრანგეთი, სირიაში სამიზნეებზე ავიადარტყმები განახორციელეს. მათი განმარტებით, ესაა პასუხი 7 აპრილს, ქალაქ დუმაზე განხორციელებულ იერიშზე, სადაც სავარაუდოდ ქიმიური იარაღი გამოიყენეს. დასავლეთი მომხდარში სირიის მთავრობას ადანაშაულებს, თუმცა ბაშარ ალ-ასადის რეჟიმი რაიმე მონაწილეობას უარყოფს.