სამართალი

ამ ეტაპზე სასამართლოზე ბრალდებულს რაიმე განცხადება არ გაუკეთებია - პროკურორი

ხორავას ქუჩაზე 2 მოზარდის განზრახ მკვლელობის საქმის პროკურორის, იოსებ ხუციშვილის ინფრომაციით, დაცვის მხარე დათანხმდა აღკვეთის ღონისძიების სახით პატიმრობის შეფარდებას.

ხუციშვილის თქმით, თვითონ ბრალდებულს სასამართლო პროცესზე არაფერი არ უთქვამს.

„ბრალდების მხარე რასაც ითხოვდა, თვითონ ბრალდებული და მისი ადვოკატი დაეთანხმნენ წარმოდგენილ შუამდგომლობას, კერძოდ პატიმრობის შეფარდებას. ამ ეტაპზე სასამართლოზე ბრალდებულს რაიმე განცხადება არ გაუკეთებია“,- თქვა პროკურორმა.

ხორავას ქუჩაზე მომხდარ განზრახ მკვლელობაში ბრალდებულ ორივე პირს თბილისის საქალაქო სასამართლოს მოსამართლემ აღკვეთის ღონისძიების სახით წინასწარი პატიმრობა შეუფარდა, რითაც დააკმაყოფილა პროკურატურის შუამდგომლობა.

ორივე ბრალდებული პირველი ექსპერიმენტული სკოლის მოსწავლეა. სასამართლო პროცესს მხოლოდ ერთ-ერთი მათგანი ესწრებოდა, მეორე მიმალვაში იმყოფება, რის გამოც წინასწარი პატიმრობა დაუსწრებლად შეეფარდა.

დღეს შსს-მ გაავრცელა ინფორმაცია, რომ აღნიშნულ საქმესთან დაკავშირებით უწყებამ კიდევ 3 პირი დააკავა.

1-ელ დეკემბერს ხორავას ქუჩაზე 51-ე სკოლის 2 მოსწავლე დაჭრეს. ერთ-ერთი მათგანი საავადმყოფოში მიყვანამდე დაიღუპა, მეორე კი 2 დეკემბერს, რესპუბლიკურ საავადმყოფოში გარდაიცვალა.

ანა მებურიშვილი