მსოფლიო

ამერიკელი დიპლომატები სხვადასხვა ქვეყნებში ოპოზიციის ქმედებებს მართვენ- სერგეი ლავროვი

რუსეთის საგარეო საქმეთა მინისტრის სერგეი ლავროვის თქმით, არსებობს უამრავი მტკიცებულება იმისა, რომ ამერიკელი დიპლომატები, სხვადასხვა ქვეყნებში, ადგილობრივი ოპოზიცის ქმედებებს მართავენ.

ამის შესახებ ლავროვმა „მნიშვნელობების ტერიტორიის“ სახელწოდების ფორუმზე განაცხადა.

„სადაც გნებავთ, ნებისმიერ ქვეყანაში, იქნება ეს აღმოსავლეთ თუ ცენტრალური ევროპა, უამრავი ფაქტია, როდესაც ამერიკის საელჩო პირდაპირ პროცესებს მართავს, მათ შორის ოპოზიციის ქმედებებს“,-განაცხადა დიპლომატმა.

მისი თქმით, მოსკოვში აშშ-ს საელჩოში ბევრი რუსი მუშაობს.

„ვენის კონვენციის თანახმად, თუკი შენ პერსონალს იმ ქვეყანაში აგროვებ, სადაც საელჩო გაქვს გახსნილი, ეს პერსონალი შეიძლება იყოს მხოლოდ ტექნიკური: მძღოლი, მბეჭდავი და სხვა. მათ არ აქვთ უფლება დაკავდნენ დიპლომატიური საქმიანობით, მათ შორის პოლიტიკური ასპექტებით“,-განმარტა ლავროვმა.

მისი თქმით, მიუხედავად ამისა, რუსულ მხარეს არაერთხელ გამოუვლენია შემთხვევები, როდესაც ამერიკის საელჩოს თანამშრომლები, რეგიონებში დადიოდნენ და აწარმოებდნენ მოსახლეობის გამოკითხვას, მაგალითად, როგორია მათი დამოკიდებულება გუბერნატორის მიმართ და სხვა.

„ასეთ შემთხვევაში, ამერიკელ კოლეგებს ზრდილობიანად ვთხოვთ, რომ ასეთ თანამშრომლებთან შრომითი ურთიერთობა გაწყვიტონ. ვფიქრობ, თავად ამერიკა ამ ყველაფერს ჩარევად არ მიიჩნევს, რადგან ერთის მხრივ, მათთვის ყველაფერი შეიძლება, და მეორე - მათ ეს სისხლში აქვთ გამჯდარი“,-დასძინა რუსეთის პირველმა დიპლომატმა.