საზოგადოება

ამერიკიდან საქართველოში 79 მოსწავლე დაბრუნდა

ამერიკიდან საქართველოში 79 არასრულწლოვანი მოსწავლე დაბრუნდა.

მოსწავლეების ყატარის დედაქალაქ დოჰაში ჩაყვანა ამერიკულმა მხარემ, ხოლო დოჰადან სპეცრეისით თბილისში ჩამოფრენა, საქართველოს მთავრობამ უზრუნველყო. ქართველ მოსწავლეებთან ერთად თბილისში სომხეთის მოქალაქე 35 მოსწავლე ჩამოვიდა.

მოსწავლეებმა თბილისის საერთაშორისო აეროპორტში გაიარეს სავალდებულო თერმოსკრინინგი და შემდეგ ჯანდაცვის სამინისტროს რეკომენდაციების სრული დაცვით ავტობუსებით, ჭადრაკული განლაგებით, განთავსდნენ თბილისსა და კახეთში არსებულ ორ საკარანტინო ზონაში, სადაც ისინი 14 დღეს დარჩებიან. კარანტინის დროს, მოსწავლეები უზრუნველყოფილნი იქნებიან სამჯერადი კვებითა და ექიმის 24-საათიანი მეთვალყურეობით, ხოლო უშუალოდ საკარანტინო ზონებს პოლიციის თანამშრომლები დაიცავენ.

რაც შეეხება მოსწავლეებს სომხეთიდან, ისინი თბილისის საერთაშორისო აეროპორტიდან სომხეთში გაემგზავრნენ.

კორონავირუსის გავრცელების საპრევენციო ღონისძიებების ფარგლებში, ეკონომიკის სამინისტროს ტურიზმის ეროვნულმა ადმინისტრაციამ 86 სასტუმროში საკარანტინო სივრცეების მოწყობას გაუწია ორგანიზება.