მსოფლიო

აშშ არალეგალებთან საბრძოლველად მზადაა, დაკავებისას მიგრანტები შვილებს დააშორონ

აშშ არალეგალების მიმართ მიდგომას ამკაცრებს. ქვეყნის გენერალური პროკურორის ჯეფ სეშნსის განცხადებით, მექსიკის საზღვარზე უკანონო გადაკვეთასთან საბრძოლველად აშშ მზადაა, დააშოროს მშობლები შვილებს და არ მოათავსონ ისინი ერთად დაკავების ცენტრებში.

სეშნსმა განაცხადა, რომ არალეგალების მიმართ „ნულოვანი ტოლერანტობის“ პოლიტიკა ამოქმედდება.

„ჩვენ ვებრძვით არალეგალი უცხოელების მასობრივ შემოსევას ჩვენს სამხრეთ-დასავლეთ საზღვარზე. მაგრამ არ ვაპირებთ ამის მოთმენას“, -თქვა გენერალურმა პროკურორმა.

თუკი ადრე არალეგალებს მექსიკაში აბრუნებდნენ, ახალი პოლიტიკა ითვალისწინებს ყველა არალეგალის დაკავებას. დაკავებულ სრულწლოვან ხალხს პირდაპირ გადაიყვანენ ფედერალურ სასამართლოში, ხოლო ბავშვებს - ლტოლვილთა განსახლების ჯანმრთელობისა და ადამიანურ მომსახურებათა ოფისის დეპარტამენტში.

ეროვნული უსაფრთხოების დეპარტამენტის ცნობით, 2017 წლის ოქტომბრიდან მოყოლებული მშობლებს 700 ბავშვი დააშორეს.