მსოფლიო

აშშ ბრიტანეთს მხარდაჭერას უცხადებს

„რესპუბლიკელი“ სენატორი ჯონ მაკკეინი დიდი ბრიტანეთის პრემიერ-მინისტრის, ტერეზა მეის გადაწყვეტილებას გამოეხმაურა და აღნიშნა, რომ ამერიკის შეერთებული შტატები საკუთარ მოკავშირეს გვერდით უნდა დაუდგეს.

მაკკეინის თქმით, რუსეთის ხელისუფლებამ შემზარავი დანაშაულისთვის პასუხი უნდა აგოს.

„პრემიერ-მინისტრ ტერეზა მეის გადაწყვეტილება, პასუხი აგებინოს პუტინს სოლსბერიში ქიმიური იარაღით თავდასხმაზე, მნიშვნელოვანია“, –წერს ჯონ მაკკეინი Twitter-ის საკუთარ გვერდზე.

შეგახსენებთ, რომ ბრიტანეთის მთავრობის მეთაურმა ტერეზა მეიმ 23 რუსი დიპლომატის ქვეყნიდან დაძევების, ბრიტანეთში რუსეთის საგარეო საქმეთა მინისტრის ვიზიტის გაუქმებისა და რუსეთის ხელისუფლებასთან უმაღლეს დონეზე ყველა სახის კონტაქტის გაუქმებაზე განაცხადა.

12 მარტს ტერეზა მეიმ მოსკოვს 24-საათიანი ულტიმატუმი წაუყენა და ყოფილი რუსი მზვერავის სერგეი სკრიპალისა და მისი ქალიშვილის მოწამვლის საქმეზე ახსნა-განმარტებების გაკეთება მოსთხოვა. წინააღმდეგ შემთხვევაში, ის სანქციებით იმუქრებოდა. გაერთიანებული სამეფოს მთავრობა მიიჩნევს, რომ დიდი ალბათობით, სკრიპალის მოწამვლაში რუსეთია დამნაშავე.

66 წლის სერგეი სკრიპალი 33 წლის ქალიშვილთან ერთად, უგონო მდგომარეობაში, ბრიტანეთის ქალაქ სოლსბერიში 4 მარტს იპოვეს.

ცირა გურგენიძე