მსოფლიო

აშშ-ის მთავრობის მუშაობის შეჩერება , შესაძლოა, რამდენიმე წელიც გაგრძელდეს -დონალდ ტრამპი ქვეყანაში საგანგებო მდგომარეობის გამოცხადებასაც განიხილავს

აშშ-ის პრეზიდენტის, დონალდ ტრამპის განცხადებით, მან, შესაძლოა, ქვეყანაში საგანგებო მდგომარეობა გამოაცხადოს , რათა ააშენოს კედელი აშშ-მექსიკის საზღვარზე კონგრესის თანხმობის გარეშე. ამის შესახებ ცნობილი გახდა თეთრ სახლში ტრამპისა და დემოკრატი კონგრესმენების შეხვედრის შემდეგ.

ტრამპის განცხადებით, კედლის აშენება საჭიროა ქვეყნის უსაფრთხოებისთვის.

აშშ-ის პრეზიდენტი და დემოკრატი კონგრესმენები - წარმომადგენელთა პალატის სპიკერი ნენსი პელოსი და სენატში დემოკრატების ლიდერი ჩაკ შუმერი ისევ ვერ შეთანხმდნენ კედლის დაფინანსებაზე.

ტრამპი ამის გამო დაემუქრა, რომ აშშ-ის მთავრობის მუშაობის შეჩერება ( ე.წ. „შათდაუნი“) შესაძლოა, რამდენიმე წელიც გაგრძელდეს.

ცნობისთვის, 22 დეკემბრიდან აშშ-ის სახელმწიფო სამსახურებში დასაქმებული 800 000-მდე თანამშრომელი ხელფასს ვერ იღებს საბიუჯეტო სახსრების არარსებობის გამო, რამაც ნაწილობრივ შეაჩარება აშშ-ის მთავრობის მუშაობა.

ამერიკელ კანონმდებლებს ჯერ კიდევ არ მიუღიათ 2019 წლის ბიუჯეტი, ვინაიდან მათ კომპრომისული გადაწყვეტილება ვერ მიიღეს მექსიკის საზღვართან კედლის მშენებლობის დაფინანსებაზე.