პოლიტიკა

ავაკოვთან პირადი კონფლიქტი არ მაქვს, ეს ჩემთვის ძალიან დაბალი დონეა - მიხეილ სააკაშვილი

საქართველოს ყოფილი პრეზიდენტისა და ოდესის ყოფილი გუბერნატორის, მიხეილ სააკაშვილის განცხადებით, მას არ აქვს პირადი კონფლიქტი არც უკრაინის პრეზიდენტ პეტრო პოროშენკოსთან, არც ქვეყნის პრემიერ-მინისტრ ვლადიმერ გროისმანთან და არც გენერალურ პროკურორ იური ლუცენკოსთან.

„არ მაქვს პირადი კონფლიქტი პოროშენკოსთან. პატივს არ ვცემ გროისმანს, მაგრამ მასთან პირადი კონფლიქტი არ მაქვს. ჩემი წყალობით ის გახდა პრემიერი. ყველაფერი გავაკეთე იაცენუკის მოსაშორებლად.

არანაირი კონფლიქტი არ მაქვს ლუცენკოსთან, ავაკოვთანაც კი, ჩემთვის ეს ძალიან დაბალი დონეა“, -აღნიშნა სააკაშვილმა.

შეგახსენებთ, დღეს მიხეილ სააკაშვილმა ხელი მოაწერა ადმინისტრაციული სამართალდარღვევის ოქმს, რომელიც ეხება უკრაინის საზღვრის უკანონოდ გადაკვეთას. მესაზღვრეებმა და პოლიციელებმა ჟურნალისტების თანდასწრებით საჯაროდ წაუკითხეს სააკაშვილს დოკუმენტის შინაარსი.

10 სექტემბერს 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა. ის ახლა ლვოვში იმყოფება.

აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი „სისხლის სამართლის კოდექსის“ 348-ე მუხლის დანაშაულის ნიშნებსაც შეიცავს.

ანა მებურიშვილი