მსოფლიო

ბარელი ნავთობის ფასმა 2014 წლის ნოემბრის შემდეგ უმაღლეს ნიშნულამდე მიაღწია

ბარელი ნავთობის ფასმა ნიუ-იორკის საფონდო ბირჟაზე 70$-იან ნიშნულს გადააბიჯა, რაც პირველად მოხდა 2014 წლის ნოემბრის შემდეგ.

სპეციალისტთა შეფასებით, მოვაჭრეთა დაჟინებული მოთხოვნები განაპირობა აშშ-ის მიერ ირანისათვის სანქციების შესაძლო განახლებამ. თავის მხრივ, ეს ირანის - ოპეკის სიდიდით მესამე მწარმოებელი ქვეყნის ექსპორტის მაჩვენებელს სერიოზულ საფრთხეს უქმნის.

მიმდინარე წელს, ბარელი ნავთობის ღირებულება უკვე 16%–ით გაიზარდა, რაც ძირითადად ოპეკის წევრი ქვეყნებისა და მათი მოკავშირეების მიერ არჩეული პოლიტიკითაა განპირობებული, ისინი ამცირებენ ნავთობის მოპოვებას და ზრდიან მარაგებს. გარდა ამისა, ნავთობის ფასზე დიდ გავლენას ახდენს გეოპოლიტიკური კრიზისი ახლო აღმოსავლეთის ქვეყნებში. შეგახსენებთ, რომ სწორედ ამ რეგიონზე მოდის ნავთობის მსოფლიო მარაგების თითქმის ნახევარი.

2015 წლის ბირთვული შეთანხმება შედგა ირანს, აშშ-ს, ჩინეთს, რუსეთს, გერმანიას, საფრანგეთისა და დიდ ბრიტანეთს შორის. ეს დოკუმენტი გულისხმობს თეირანის მიერ ბირთვული იარაღის შექმნაზე უარის თქმას, ამის სანაცვლოდ კი ირანს მოუხსნეს ეკონომიკური სანქციები, მათ შორის ნავთობის საერთაშორისო გაყიდვაზე.

დონალდ ტრამპმა აღნიშნული შეთახნმება არანორმალური უწოდა და აპირებს იქიდან გასვლას, თუკი კონგრესი და ევროპელი მოკავშირეები 12 მაისისთვის არ შეთანხმდებიან ცვლილებებზე და არ შეცვლიან ხარვეზებს დოკუმენტში. აშშ-ის პრეზიდენტმა ასევე განაცხადა, რომ ხელახლა აამოქმედებს მოხსნილ სანქციებს.

თავის მხრივ, ირანის პრეზიდენტი ჰასან როჰანი უარყოფითად გამოეხმაურა შეთანხმების შესაძლო გადახედვას. მან ეს ინიციტივა უკანონო უწოდა და გააფრთხილა ვაშინგტონი, რომ აშშ ამის გამო ინანებს.