საზოგადოება

„ბავშვთა სამყაროს“ მოვაჭრეების ადვოკატი რიმა ბერაძის მხრიდან შესაძლო მუქარაზე საუბრობს

სავაჭრო ცენტრ „ბავშვთა სამყაროში“ ხანძრის შედეგად დაზარალებული მოვაჭრეების უფლებამაცველის, ფრიდონ სუხიაშვილის განცხადებით, საკრებულოს დეპუტატის, რიმა ბერაძე მოვაჭრეებს ემუქრება და აქციის შეწყვეტას ითხოვს. ამის შესახებ მან აშშ-ის საელჩოსთან მიმდინარე აქციაზე თქვა.

„რიმა ბერაძე უშუალოდ ჩვენთან ახორციელებდა მოლაპარაკებებს, დაურეკავს და ხალხს ემუქრება, რომ თუ თქვენ არა დათანხმდებით 3000 ლარს, ჩვენ ამ თანხას უკან გავითხოვთ და გადავცემთ სოცილურად დაუცველებს“, - განაცხადა სუხიაშვილმა.

წინა კვირას სავაჭრო ცენტრ „ბავშვთა სამყაროში“ გაჩენილი ხანძრის შედეგად დაზარალებულმა მოვაჭრეებმა საკრებულოს ფრაქციის „ქართული ოცნება - დემოკრატიული საქართველოსთვის“ თავმჯდომარის რიმა ბერაძის მიერ შეთავაზებულ 3000-ლარიან ერთჯერად კომპენსაციაზე უარი თქვეს. მოვაჭრეების განმარტებით, ეს წინადადება უსამართლოა და ვერ ფარავს მათ ფინანსურ ზარალს. ისინი მინიმუმ, 5000-ლარიანი კომპანსაციის გაცემას ითხოვენ.

როგორც მოვაჭრეებმა შაბათს მთავრობის კანცელარიასთან გამართულ აქციაზე განაცხადეს, ისინი საელჩოებთან მივლენ იქამდე, სანამ ხელისუფლება მათ მოთხოვნას არ შეასრულებს.

შეგახსენებთ, რომ სავაჭრო ცენტრ „ბავშვთა სამყაროში“ ხანძარი 30 იანვარს გაჩნდა, რომლის შედეგად 1000-ზე მეტი მოვაჭრე დაზარალდა. გამოძიება ხანძრის გამომწვევ მიზეზებზე ამ დრომდე მიმდინარეობს.

ანა მებურიშვილი