უკან

უახლესი ამბები

დღის კალენდარი

ანონსები

არქივი

პოლიტიკა

30 მაისი, 2018 15:50
font-size

ჩემი ძალებით ყველაფერს ვაკეთებდი სომხურ-ქართული ურთიერთობების განვითარების ხელშესაწყობად - ნიკოლ ფაშინიანი

ჩემთვის დიდი პატივია პირველი ოფიციალური ვიზიტით საქართველოში ყოფნა, ვინაიდან, ჩვენს პოლიტიკურ დღის წესრიგში საქართველოსთან ურთიერთობების სამომავლო განვითარებას განსაკუთრებული ადგილი და მნიშვნელობა ენიჭება, - განაცხადა სომხეთის პრემიერ-მინისტრმა, ნიკოლ ფაშინიანმა საქართველოში ვიზიტის ფარგლებში საქართველოს მთავრობის მეთაურთან გამართულ ერთობლივ პრესკონფერენციაზე.

,,ჩვენ ყოველთვის ვმუშაობდით, ვცდილობდით სომხურ-ქართული ურთიერთობების განვითარებას, იმის მიუხედავად, რა საქმიანობას ვეწეოდით. მე, როგორც ჟურნალისტი, როგორც დეპუტატი და ახლა როგორც სომხეთის რესპუბლიკის პრემიერ-მინისტრი ჩემი ძალებით ყველაფერს ვაკეთებდი სომხურ-ქართული ურთიერთობების განვითარების ხელშესაწყობად“, - განაცხადა ნიკოლ ფაშინიანმა.

სომხეთის პერემიერ-მინისტრმა ქართველ ხალხს პირველი დემოკრატიული რესპუბლიკის დაარსების 100 წლის იუბილე მიულოცა.

,,ახლა იმ კონკრეტულ ვითარებაში ვართ, როდესაც ჩვენი მრავალი სურვილის განხორციელების შესაძლებლობა გვაქვს. მინდა, კიდევ ერთხელ მივულოცო ქართულ სახელმწიფოს, ქართველ ხალხს და პირადად ბატონ პრემიერ-მინისტრს პირველი დემოკრატიული რესპუბლიკის დაარსების 100 წლის იუბილე. ჩვენც აღვნიშნეთ ეს თარიღი და ნამდვილად, ეს დღესასწაულები ერთმანეთთან არის დაკავშირებული. სომხეთმა პირველი დემოკრატიული რესპუბლიკის დაარსება თბილისში გამოაცხადა და ეს ფაქტი თავისთავად გვიჩვენებს, რომ სომხურ-ქართული ურთიერთობები არის ძალიან ღრმა. ორ ქვეყანას აქვს პოლიტიკური, ისტორიული, კულტურული, ხალხთაშორისი კონტექსტი. ეს კავშირები შემდგომში უფრო უნდა განვითარდეს და გაღრმავდეს. ჩვენ შევთანხმდით ამ მიმართულებით ინტენსიური ნაბიჯების გადადგმაზე.

საერთო ჯამში, შევთანხმდით, რომ ის ატმოსფერო, რომელიც სომხურ-ქართულ ურთიერთობებშია და რომელიც ყოველთვის იყო პოზიტიური, გადავიყვანოთ ახალ დინამიკაში, კონკრეტულ შედეგებში, მათ შორის - ორმხრივი ეკონომიკური ურთიერთობები.

სომხეთ-საქართველოს ეკონომიკური თანამშრომლობის მთავრობათაშორისი კომისიის გააქტიურების მეშვეობით, ჩვენ შევძლებთ კონკრეტული შედეგების დაფიქსირებას ორმხრივი ურთიერთობების მრავალ სფეროში“, - განაცხადა სომხეთის პრემიერ-მინისტრმა.

მისი თქმით, სომხურ-ქართულ ურთიერთობებში არ არსებობს გადაუწყვეტელი საკითხები.

,,რა თქმა უნდა, განვიხილეთ ურთიერთობებში გრძელვადიანი ხედვის საჭიროება. ჩვენ გვაქვს როგორც გრძელვადიანი, ისე მოკლევადიანი საერთო ინტერესები და ყველაფერი უნდა გავაკეთოთ, რათა არსებული თანამშრომლობა, გრძელვადიანი ხედვის შესაბამისად განვავითაროთ.

ჩვენ საქართველოსთან მრავალი ერთობლივი პროექტი გვაკავშირებს და ვიმუშავებთ მათი დროულად და მაღალი ხარისხით განხორციელებისთვის. ასევე, ვიმუშავებთ ახალ პროექტებზე; აღსანიშნავია, რომ სომხურ-ქართულ ურთიერთობებში არ არსებობს გადაუწყვეტელი საკითხები, მთავარი ფაქტორი აქ განწყობა და სურვილია.

ჩვენი დელეგაცია საქართველოში ჩამოვიდა ჩვენი მზაობის დასაფიქსირებლად, ძმობისა და მეგობრობის ურთიერთობების განსახილველად და ვფიქრობ, ამ ატმოსფეროს შეუძლია, სერიოზული განვითარება მოუტანოს ჩვენს ურთიერთობებს. მოხარული ვარ აღვნიშნო, რომ საქართველოს მთავრობა და კონკრეტულად ბატონი პრემიერ-მინისტრი ამავე აზრისაა.

ჩვენ ვიმყოფებით ჩვენი ურთიერთობების განვითარების ისეთ ფაზაზე, როდესაც გვაქვს შესაძლებლობა, დიდი სტიმული მივცეთ ჩვენს ორმხრივ ურთიერთობებს, გავაღრმავოთ ისინი ყველა მიმართულებით და ყველა დონეზე.

რა თქმა უნდა, უმნიშვნელოვანესი საკითხია რეგიონის მდგრადობა. ჩვენ ბატონ პრემიერთან გავცვალეთ მოსაზრებები რეგიონული მდგრადობის, სიმშვიდის, უსაფრთხოების საკითხებთან დაკავშირებით. ჩვენ ამ მიმართულებით ერთობლივი ძალისხმევა უნდა მივმართოთ, ვინაიდან რეგიონის მშვიდობა და მდგრადობა ჩვენი მომავალი განვითარების წინაპირობაა.

ჩვენ შთაბეჭდილების ქვეშ ვართ საქართველოს საზოგადოების დამოკიდებულებით სომხეთში აპრილ-მაისში მომხდარი ხავერდოვანი რევოლუციის მიმართ. ჩვენ გვახსოვს ქართველი ჟურნალისტების აქტიური მონაწილეობა. აქ ვხედავ ნაცნობ სახეებს, რომლებიც ჩვენთვის უკვე ახლობელია. ბოლო 15-20 დღის განმავლობაში ჩვენ მათ ხშირად ვხედავდით და მოხარული ვარ, რომ დღეს აქ ისევ შევხვდი. ვფიქრობ, ეს ინტერესი შენარჩუნებული იქნება არა მხოლოდ დიდი პოლიტიკური საკითხების გადაწყვეტისას, არამედ საერთო ურთიერთობებში. ჩვენ ხშირ შემთხვევაში არ ვიცით ჩვენს ქვეყნებში მიმდინარე მნიშვნელოვანი მოვლენების შესახებ და ჟურნალისტიკის სფეროში ჯერ ბევრი საკითხი გვაქვს გასარკვევი, რათა ინფორმირებული ვიყოთ ამ ორ ქვეყანაში მიმდინარე პროცესების შესახებ. ჩვენ გეოგრაფიულად ახლოს ვართ, მაგრამ ჩვენს ქვეყნებსა და ხალხებს პოლიტიკური პროცესების უფრო კარგად გაცნობის საჭიროება აქვთ.

ჩვენ აქ ჩამოვედით კონკრეტული პერსპექტივების გასახსნელად, კონკრეტული საკითების გადაწყვეტის შესაძლებლობის შესაქმნელად. დარწმუნებული ვარ, ჩვენს ურთიერთობებში იქნება სერიოზული და ახალი განვითარებები და ისინი სომხეთის რესპუბლიკის და საქართველოს ინტერესებიდან უნდა გამომდინარეობდეს. ჩვენ, როგორც სუვერენული ქვეყნები, მოვალენი ვართ, ჩვენი საერო ინტერესებიდან გამომდინარე ვიმოქმედოთ.

დარწმუნებული ვართ, რომ ჩვენს მთავრობებს აქვთ საკმარისი ნება და უნარი, შევძლოთ ეს ურთიერთობა გავხადოთ კიდევ უფრო ეფექტური და ისეთი დონის, რომ სომხეთის და საქართველოს მოქალაქეებმა თავიან ყოველდღიურ ცხოვრებაში იგრძნონ ჩვენი მეგობრობის გაღრმავება და ისეთივე ატმოსფერო, როგორიც ჩემი და პრემიერ-მინისტრის დღევანდელი შეხვედრისას იყო.

დიდი მადლობა თბილი მიღებისთვის. დარწმუნებული ვარ, თბილისში საინტერესო და შინაარსიან დროს გავატარებ. ბატონო პრემიერო, იმედი მაქვს ახლო მომავალში გიხილავთ ერევანში, რათა ეს ურთიერთობები შემდგომშიც გავაგრძელოთ.

ვიმედოვნებ, შემოდგომაზე, ფრანკოფონიის სამიტზე საქართველო მაღალ დონეზე იქნება წარმოდგენილი და ჩვენ შეხვედრის არაერთი შესაძლებლობა გვექნება. ჩვენ ამას არ უნდა დავჯერდეთ, უნდა გავუღიმოთ ერთმანეთს და ხშირად განვიხილოთ საკითხები მეგობრულ ატმოსფეროში მათ გადასაწყვეტად. მივესალმები მეგობარ ქართველ ხალხს“, - განაცხადა ნიკოლ ფაშინიანმა.

საქართველოს სახელმწიფოს წინააღმდეგ ოქტომბერში განხორციელებული კიბერთავდასხმა მიზნად ისახავდა ჩვენი სუვერენიტეტისადმი ძირის გამოთხრას - გიორგი გახარია

20 თებერვალი, 2020 , 19:12

საქართველოს სახელმწიფოს წინააღმდეგ ოქტომბერში განხორციელებული კიბერთავდასხმა მიზნად ისახავდა ჩვენი სუვერენიტეტისადმი ძირის გამოთხრას, - ასე ეხმაურება საქართველოს პრემიერ-მინისტრი გიორგი გახარია საქართველოში გასული წლის ო

28 ოქტომბრის კიბერშეტევით რუსეთმა პირდაპირი იერიში მიიტანა ქვეყნის სუვერენიტეტსა და ეროვნულ უსაფრთხოებაზე -საქართველოს პრეზიდენტის ადმინისტრაცია

20 თებერვალი, 2020 , 18:48

2019 წლის 28 ოქტომბერს საქართველოს პრეზიდენტის ოფიციალურ ვებგვერდზე განხორციელებული კიბერშეტევით რუსეთმა პირდაპირი იერიში მიიტანა ქვეყნის სუვერენიტეტსა და ეროვნულ უსაფრთხოებაზე, რითიც შეეცადა სახელმწიფო ინსტიტუტების საქმ

ბრიტანეთი რუსეთის მიერ საქართველოს წინააღმდეგ განხორციელებულ კიბერშეტევას გმობს

20 თებერვალი, 2020 , 18:34

გაერთიანებული სამეფო გმობს რუსეთის „გრუ“-ს მიერ საქართველოს წინააღმდეგ განხორციელებულ კიბერშეტევას,- ამის შესახებ გაერთიანებული სამეფოს საგარეო საქმეთა სამინისტროს განცხადებაშია ნათქვამი, რომლის თარგმანს საქა

დაჭერებით ქვეყანა ვერ შეიცვლება - თემურ შაშიაშვილი

20 თებერვალი, 2020 , 17:54

„თეთრების“ ლიდერი თემურ შაშიაშვილი, როგორც ზეშეცდომას ისე აფასებს ირაკლი შოთაძის გენპროკურორად ხელმეორე დანიშვნას. „ შოთაძე, როგორც პროკურორი, საერთოდ არის ჩემთვის გაუგებრობა.პირველად რომ დაინიშნა, იყო

რუსეთმა საქართველოს სახელმწიფო უწყებებზე კიბერშეტევა განახორციელა - საგარეო საქმეთა სამინისტრო

20 თებერვალი, 2020 , 17:45

საქართველოს საგარეო საქმეთა სამინისტროს ინფორმაციით, 2019 წლის 28 ოქტომბერს საქართველოში, სახელმწიფო უწყებებზე კიბერშეტევა განხორციელდა. უწყების ცნობით, აღნიშნული კიბერშეტევა დაიგეგმა და განხორციელდა რუსეთის ფედერაციის შ

საქართველოს პრეზიდენტს თავდაცვისა და უსაფრთხოების საკითხებში ახალი მრჩეველი ჰყავს

20 თებერვალი, 2020 , 17:02

საქართველოს პრეზიდენტმა თავდაცვისა და უსაფრთხოების საკითხებში მრჩევლად გელა გიორგაძე დანიშნა. პრეზიდენტის ადმინისტრაციის პრესსამსახურის ინფორმაციით, გიორგაძე მოვალეობის შესრულებას დღეიდან შეუდგა. გელა გიორგაძე საქართველო

პირდაპირი TV

daily calendar

ვიდეო გალერეა

ზაზა ოქუაშვილის პირდაპირი ჩართვა გადაცემაში `რეაქცია`