მსოფლიო

დღეს რუსეთის წინააღმდეგ აშშ-ის ახალი სანქციები ამოქმედდა

დღეს ძალაში შევიდა აშშ-ის ახალი სანქციები რუსეთის წინააღმდეგ. ისინი მიმართულია ნებისმიერი ქვეყნის ფიზიკური პირისა თუ კომპანიის წინააღმდეგ, რომლებიც კონტრაქტებს გააფორმებენ ან „არსებით გარიგებაში“ შევლენ რუსული თავდაცვითი სექტორის კომპანიებთან.

სანქციები ამოქმედდა დონალდ ტრამპის მიერ 2017 წლის აგვისტოში ხელმოწერილი კანონის ფარგლებში. ე.წ. შავ სიაში მოხვდა 39 რუსული კომპანია თუ ორგანიზაცია, რომლებიც შეყვანილია აშშ-ის სახელმწიფო დეპარტამენტის მიერ. მათთან თანამშრომლობითა და მუშაობით როგორც რუსულ, ასევე სხვა ქვეყნის კომპანიებს სანქციები დაეკისრებათ.

აღნიშნულ შავ სიაში მოხვდა, მაგალითად, „როსობორონექსპორტი“, რომელიც მონოპოლისტად ითვლება რუსეთის შეიარაღების ექსპოტისა და იმპორტის კუთხით. სიაში ასევე შეყვანილი არიან რუსეთის უშიშროების ფედერალური სამსახური, საგარეო დაზვერვის სამსახური და გენერალური შტაბის მთავარი სამმართველო.