მსოფლიო
დიდი ალბათობით, ბრიტანეთის ტერიტორიაზე ქიმიური იარაღის გამოყენების ბრძანება ვლადიმერ პუტინმა გასცა - ბორის ჯონსონი
ბრიტანეთის საგარეო საქმეთა მინისტრის, ბორის ჯონსონის თქმით, დიდი ალბათობით, დიდი ბრიტანეთის ტერიტორიაზე ყოფილი რუსი ჯაშუშის, სერგეი სკრიპალის ქიმიური ნივთიერებით მოწამვლის ბრძანება უშუალოდ რუსეთის პრეზიდენტმა, ვლადიმერ პუტინმა გასცა. ამის შესახებ Sky News-ი წერს.
ჯონსონის თქმით, რუსეთში დამზადებული ქიმიური ნივთიერების გამოყენების უკან სწორად რუსეთი დგას.
რუსეთის მთავარი სადაზვერვო სამმართველოს ყოფილი ოფიცერი სერგეი სკრიპალი და მისი ქალიშვილი 4 მარტს მოწამლეს ქალაქ სოლსბერში. გარდა ამისა დაშავდა 20-მდე სამოქალაქო პირი და პოლიციელი. როგორც დადგინდა, სკრიპალის მოსაწამლად რუსეთში გამზადებული ნერვო-პარალეპტიკური გაზი სახელწოდებით ნოვიჩოკი გამოიყენეს.
12 მარტს დიდი ბრიტანეთის პრემიერ-მინისტრმა ტერეზა მეიმ რუსეთს 24-საათიანი ულტიმატუმი წაუყენა, რათა მოსკოვს პასუხი გაეცა, როგორ მოხვდა ეს ნივთიერება ბრიტანეთის ტერიტორიაზე.
რუსეთმა ამ ულტიმატუმზე არ უპასუხა. ამის შემდეგ მეიმ თემთა პალატაში გამართულ ყოველკვირეულ შეხვედრაზე განაცხადა, რომ ქვეყნიდან გააძევებენ 23 რუს დიპლომატს და დიდი ბრიტანეთის დასატოვებლად მათ ერთი კვირა აქვთ.
გარდა ამისა, ლონდონი მოსკოვთან ყველა დონის ურთიერთობას წყვეტს.
დიდი ბრიტანეთის საპასუხოდ რუსეთის საგარეო საქმეთა მინისტრმა სერგეი ლავროვმა განაცხადა, რომ კრემლი ქვეყნიდან გააძევებს ბრიტანელ დიპლომატებს.