პოლიტიკა

დილიდან თვალს ვადევნებთ იმას, რაც წინა ხელისუფლების დროს საშინლად არ მოგვწონდა და გვაცოფებდა - ალეკო ელისაშვილი

თბილისის მერობის დამუკიდებელი კანდიდატი ალეკო ელისაშვილი ხელისუფლებას ადმინისტრაციული რესურსის გამოყენებაში ადანაშაულებს.

როგორც ელისაშვილმა სპეციალურ ბრიფინგზე განაცხადა, რომ "ქართული ოცნების" კოორდინატორები საარჩევნო უბნებთან დგანან სიებით და აღრიცხავენ მათ მხარდამჭერების საარჩევნო უბნებზე მისვლას.

მისივე თქმით, არის საარჩევნო კარუსელის მცდელობაც.

"დილიდან თვალს ვადევნებთ იმას, რაც წინა ხელისუფლების დროს საშინლად არ მოგვწონდა და გვაცოფებდა. დღეს ხდება თბილისში შეხვედრა წარსულთან. ყველა საარჩევნო უბანთან მობილიზებულები არიან შავებში ჩაცმული ადამიანები აფორიაქებული სახეებით, საწერი კალმებით, სიებით, დაარბენინებენ საჯარო სამსახურში დასაქმებულ ადამიანებს, გაშმაგებულები ეზიდებიან ხალხს კოორდინატორები. უზარმაზარი ადმინისტრაციული მანქანაა დაქოქილი იმისთვის, რომ საკუთარი მხარდამჭერები ძალით მოიყვანონ უბნებზე. რა თქმა უნდა ამის ორგანიზატორი არის ხელისუფლება", - აცხადებს ალეკო ელისაშვილი.

კანდიდატის თქმით, მისმა წარმომადგენლებმა საარჩევნო უბნებზე უკვე დაწერეს საჩივრები. ელისაშვილი კიდევ ერთხელ მოუწოდებს ამომრჩეველს არჩევნებზე მისვლისკენ.

ნინო ექვთიმიშვილი