პოლიტიკა

ჯერ მთელ უკრაინაში ვიმოგზაურებ და შემდეგ კიევში ჩავალ - მიხეილ სააკაშვილი

საქართველოს ყოფილი პრეზიდენტი და ოდესის ყოფილი გუბერნატორი, მიხეილ სააკაშვილი კიევში დაბრუნებამდე მთელ უკრაინაში მოგზაურობას აპირებს.

„მე აუცილებლად ჩავალ კიევში რამდენიმე დღეში, რამდენიმე კვირაში.. მაგრამ მანამდე მთელ უკრაინაში ვიმოგზაურებ“, -განუცხადა სააკაშვილმა ჟურნალისტებს ლვოვის სასტუმრო ლეოპოლისიდან გამოსვლისას.

შეგახსენებთ, დღეს ლვოვში, სასტუმრო ლეოპოლისის წინ მიხეილ სააკაშვილმა ხელი მოაწერა ადმინისტრაციული სამართალდარღვევის ოქმს, რომელიც ეხება უკრაინის საზღვრის უკანონოდ გადაკვეთას. მესაზღვრეებმა და პოლიციელებმა ჟურნალისტების თანდასწრებით საჯაროდ წაუკითხეს სააკაშვილს დოკუმენტის შინაარსი.

10 სექტემბერს 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა. ის ახლა ლვოვში იმყოფება.

აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი „სისხლის სამართლის კოდექსის“ 348-ე მუხლის დანაშაულის ნიშნებსაც შეიცავს.

ანა მებურიშვილი