მსოფლიო
დონალდ ტრამპი რუსეთისგან ყირიმის დაბრუნებას ელოდება
ამერიკის პრეზიდენტი მოსკოვისგან უკრაინაში კონფლიქტის დეესკალაციასა და ყირიმის დაბრუნებას ელოდება, ამასთან, როგორც თეთრი სახლის პრესმდივანმა აღნიშნა, დონალდ ტრამპს კრემლთან კეთილი ურთიერთობის დამყარების იმედი აქვს.
ამის შესახებ შონ სპაისერმა პრესკონფერენციაზე განაცხადა.
„პრეზიდენტმა ტრამპმა მკაფიოდ აღნიშნა, რომ რუსეთის მთავრობისგან უკრაინაში ძალადობის დეესკალაციასა და ყირიმის დაბრუნებას ელოდება. ამასთან, პრეზიდენტი ცდილობს რუსეთთან კეთილი ურთიერთობა დაამყაროს“,-აღნიშნა თეთრი სახლის პრესმდივანმა.
მანამდე ამერიკის თავდაცვის უწყების ხელმძღვანელმა ჯეიმს მეტისმა განაცხადა, რომ ჩრდილოატლანტიკურმა ალიანსმა ახალ გამოწვევებთან ადაპტირება უნდა მოახერხოს, რომელიც რუსეთის მიერ ყირიმის ანექსიის შემდეგ შეიქმნა.
მისი თქმით, 2014 წელი ალიანსისა და მოსკოვის ურთიერთობაში გარდამტეხი აღმოჩნდა, რადგან მოსკოვთან „პარტნიორობის იმედი ფუჭი აღმოჩნდა“.
აღნიშნული განცხადება პენტაგონის ხელმძღვანელმა ნატოს წევრი-ქვეყნების თავდაცვის მინისტრების შეხვედრამდე გააკეთა, რომელიც ბრიუსელში 15-16 თებერვალს გაიმართება.
მონიკა დავლიანიძე