მსოფლიო

დონალდ ტრამპის ადმინისტრაციამ აზერბაიჯანის ხელისუფლებას აფგან მუხთარლის გათავისუფლება მოსთხოვა

აშშ-ის პრეზიდენტის დონალდ ტრამპის ადმინისტრაციამ მოუწოდა აზერბაიჯანის ხელისუფლებას, გაათავისუფლოს ჟურნალისტი აფგან მუხთარლი. განცხადებას აშშ-ის სახელმწიფო დეპარტამენტი ავრცელებს.

„აშშ შეწუხებულია იმით, რომ 12 იანვარს აზერბაიჯანელ ჟურნალისტ აფგან მუხთარლის 6-წლიანი პატიმრობა მიესაჯა. გავრცელებული ინფორმაციით, მუხთარლი საქართველოში 30 მაისს გაიტაცეს და აზერბაიჯანში ჩაიყვანეს, სადაც კონტრაბანდაში წაუყენეს ბრალი, რომელიც ფართო წრეებში პოლიტიკურად მოტივირებულად მიიჩნევა.

მოვუწოდებთ აზერბაიჯანის მთავრობას, გაათავისუფლოს მუხთარლი და ყველა პირი, ვინც სასჯელს საკუთარი ძირითადი უფლებების დაცვისთვის იხდის.

ჩვენ ასევე ყურადღებით ვაკვირდებით საქართველოში მიმდინარე გამოძიებას მუხთარლის გატაცების საქმეზე და ვიმედოვნებთ, რომ ის იქნება სრული, გამჭირვალე და დროული“, -ნათქვამია განცხადებაში.

გუშინ აზერბაიჯანულმა სასამართლომ ჟურნალისტ აფგან მუხთარლის 6 წლით თავისუფლების აღკვეთა მიუსაჯა.