მსოფლიო
დონალდ ტრამპმა ვლადიმერ პუტინი შემოდგომაზე ვაშინგტონში დაპატიჟა
აშშ-ის პრეზიდენტმა დონალდ ტრამპმა თავისი რუსი კოლეგა ვლადიმერ პუტინი შემოდგომაზე ვაშინგტონში მიიწვია. ამის შესახებ თეთრი სახლის პრესმდივანმა სარა სანდერსმა განაცხადა და აღნიშნა, რომ ვიზიტზე მსჯელობა უკვე მიმდინარეობს.
„ჰელსინკიში აშშ-ის პრეზიდენტი დათანხმდა მუდმივ სამუშაო დიალოგზე ორი ქვეყნის უსაფრთხოების საბჭოს თანამშრომლებს შორის. პრეზიდენტმა ტრამპმა სთხოვა ჯონ ბოლტონს [ტრამპის მრჩეველი ეროვნული უსაფრთხოების საკითხში], მიიწვიოს პრეზიდენტი პუტინი ვაშინგტონში შემოდგომაზე და ამაზე მსჯელობა უკვე მიმდინარეობს“, -დაწერა სანდერსმა ტვიტერზე.
მანამდე ტრამპმა უარყო პუტინის შეთავაზება, დაუშვას რუსეთის მიერ აშშ-ის მოქალაქეების დაკითხვა.
ცნობისთვის, ორშაბათს ფინეთის დედაქალაქ ჰელსინკიში ტრამპისა და პუტინის შეხვედრა გაიმართა.
ვლადიმერ პუტინი პრეზიდენტის რანგში აშშ-ს 7-ჯერ ეწვია, მაგრამ აქედან მხოლოდ სამჯერ ოფიციალური ვიზიტით. ბოლოს ეს მოხდა 2007 წელს, როცა პუტინი აშშ-ის მაშინდელ პრეზიდენტ ჯორჯ ბუშ-უმცროსს შეხვდა.