სამართალი

ელისო კილაძე ნარკოტიკის ჩადების სავარაუდო ფაქტს ასაჯაროებს

გაზეთ „ქრონიკა პლიუსის“ რედაქტორი, ელისო კილაძე ნარკოტიკის ჩადების სავარაუდო ფაქტს ასაჯაროებს.

როგორც კილაძემ დღეს გამართულ პრესკონფერენციაზე განაცხადა, მას უცნობმა პირმა რედაქციაში ვიდეომასალა მიუტანა, რომელზეც ერთი წლის წინ ლაშა ვაშაკიძის დაკავებაა ასახული.

„ჩემთვის უცნობმა პირმა გადმომცა დისკი და მითხრა, რომ მასზე ასახულია ჩადების ფაქტი და როდესაც ვკითხე, ვინაობა იცის თუ არა, ვის უდებენ ნარკოტიკს ან იარაღს, მან მითხრა, რომ ვინაობა არ იცის. ეს ფირი სრულად ავტვირთე ფეისბუქის გვერდზე, დამიკავშირდა ჩემთვის უცნობი ქალბატონი, მან მითხრა, რომ ვიდეოფირზე არის მისი მეუღლე, ლაშა ვაშაკიძე, მას ნამდვილად ჩაუდეს ნარკოტიკული საშუალება და იარაღი,“ - განაცხადა ელისო კილაძემ.

პრესკონფერენცია ჟურნალისტმა დღეს ლაშა ვაშაკიძის ადვოკატთან, გაგი მოსიაშვილთან ერთად გამართა.

„ამ ვიდეო ჩანაწერში, რეალურად, აბსოლუტურად განსხვავებული რეალობაა სისხლის სამართლის ოფიციალურ საქმესთან მიმართებაში. ჩვენ მზად ვართ, რომ ყველა სამართლებრივი რეაგირება განვახორციელოთ და დავიცვათ ლაშა ვაშაკიძის კანონიერი ინტერესები,“ - განაცხადა ადვოკატმა.